पिंपरी : पुढारी वृत्तसेवा : देशासाठी शहीद झालेल्या जवानाच्या पित्याची दोघांनी मिळून फसवणूक केली. हा प्रकार 20 ऑगस्ट 2017 ते 2 ऑगस्ट 2023 या कालावधीत निगडी येथे घडला. राजेंद्र भीमराव बारपट्टे (65, रा. निगडी) यांनी निगडी पोलिस ठाण्यात फिर्याद दिली आहे. त्यानुसार, रतन ब्रिजलाल सोनकर (49, रा. पिंपरी), सतीश सोनकर (49, रा. पिंपळे सौदागर) यांच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी यांचा मुलगा कुणाल बारपट्टे हा भारतीय सैन्य दलात नोकरीला होता. उच्च तंत्रज्ञान व व्यावसायिक प्रशिक्षणासाठी एक संस्था स्थापन करण्याची कुणालची इच्छा होती. मात्र, दरम्यानच्या काळात कुणालला वीरमरण आले. त्यानंतर फिर्यादी यांनी मुलाची इच्छा पूर्ण करण्याचे ठरवले.
फिर्यादी जागा शोधत असताना आरोपींनी फिर्यादी यांना संस्थेसाठी जागा मिळवून देतो, असे सांगून त्यांचा विश्वास संपादन केला. एका जागेचे साठेखत करार करून फिर्यादीकडून वेळोवेळी 59 लाख 50 हजार रुपये घेतले. त्यानंतर मूळ जागामालकाला 10 लाख रुपये, रजिस्ट्रेशन व मुद्रांक खर्च 10 लाख रुपये आणि कंपाउंडसाठी 50 हजार आरोपींनी दिले. उर्वरित 39 लाख रुपये न देता तसेच, जागेचे खरेदीखत करून न देता फिर्यादी यांची फसवणूक केली. निगडी पोलिस तपास करीत आहेत.
हेही वाचा :
