हिरकणी आता नव्या रूपात; पुण्यातील कार्यशाळेत 120 बसची बांधणी सुरू

पुणे; पुढारी वृत्तसेवा : महाराष्ट्र राज्य मार्ग परिवहन महामंडळासाठी 200 सेमी लक्झरी गुलाबी हिरकणी बसबांधणीचे काम युध्दपातळीवर सुरू असून, यातील 120 बस पुण्यातील दापोडी कार्यशाळेत बांधण्यात येत आहेत. नागपूर कार्यशाळेत 30, बस तर संभाजीनगर कार्यशाळेत 50 बसबांधणीचे काम सुरू आहे.

एकेकाळी एसटी गाड्यांची अवस्था मरणासन्न झाली होती. त्यात प्रवासी बसेनासे झाले होते. मात्र, आता पुण्यातील पीएमपीएमएल आणि मुंबईतील बीआरटीप्रमाणे एसटी महामंडळाच्या बस देखील कात टाकत आहेत. एसटीच्या ताफ्यात नुकत्याच इलेक्ट्रिक शिवशाही, इलेक्ट्रिक शिवनेरी आणि नव्या लालपरी बस दाखल होत आहेत. त्यांच्यासोबतच आता नव्या रूपातील या गुलाबी/हिरव्या रंगाच्या हिरकणी बस दाखल होणार आहेत.

दापोडी कार्यशाळेत बांधणी होत असलेल्या 120 बसपैकी 70 बस एसटीच्या पुणे विभागाला मिळणार आहेत. त्यातील 40 हिरकणी बस पुणे विभागाला यापूर्वी देण्यात आल्या आहेत, तर आणखी 20 बससुद्धा नुकत्याच दिल्या आहेत. तर आणखी 10 बस पुणे विभागाला देणे बाकी आहे. अशा एकूण 70 बस पुणे विभागाला मिळतील. उर्वरित 130 बसचे राज्यभरातील एसटी डेपोंना वाटप करण्यात येत आहे.