शिक्रापूर (पुणे) पुढारी वृत्तसेवा: पिंपळे जगताप ता. शिरुरमधील बोत्रेवस्ती येथील एका युवकाने ऐन यात्रेच्या दिवशी रागाच्या भरात आपल्या स्वतःच्या घरची कार व बंगला पेटवून देऊन गावामध्ये तमाशा पाहण्यासाठी गेल्याची घटना घडली. मात्र शिक्रापूर पोलीस व नागरिकांनी तातडीने आग विझवत बंगला व कार पेटवणाऱ्या युवकाला ताब्यात घेतले. प्रज्योत कांतीलाल तांबे असे या युवकाचे नाव असून त्याच्या विरुद्ध गुन्हा दाखल करण्यात आला आहे.
पिंपळे जगताप ता. शिरुरमधील बोत्रेवस्ती येथील प्रज्योत तांबे या युवकाचे आई वडील नजीकच्या वाजेवाडीमध्ये गेलेले असताना प्रज्योत याने बंगल्याच्या बाजूला असलेली एम एच १२ एजी ९४१८ ही कार पेटवून देत बंगल्यात देखील आग लागली. या घटनेची माहिती पोलीस निरीक्षक प्रमोद क्षिरसागर यांना मिळताच पोलीस उपनिरीक्षक अमोल खटावकर, पोलीस हवालदार भरत कोळी, उद्धव भालेराव, वाजेवाडीच्या पोलीस पाटील सोनाली वाजे, कचरूनाना वाजे यांनी सदर ठिकाणी धाव घेतली. दरम्यान कारने मोठ्या प्रमाणात पेट घेतल्याने चारही टायर तसेच सिलेंडरने स्फोट घेतला. आग लावणारा युवक फरार झाला. यावेळी प्रकाश गायकवाड, कचरूनाना वाजे, वैभव दरेकर, प्रकाश वाजे, रवी वाजे, गजानन गायकवाड, काळूराम बोत्रे, संदीप जगताप यांसह आदींनी शेजारील पाण्याची मोटार चालू करुन आग विझवली. मात्र तोपर्यंत संपूर्ण कार, बंगल्यातील सर्व धान्य, कपडे यांसह काही वस्तू जळून खाक झाल्या.
दरम्यान आग लावणारा प्रज्योत तांबे गावामध्ये यात्रेत सुरु असलेला तमाशा पाहत बसल्याचे पोलिसांना समजताच पोलीस उपनिरीक्षक अमोल खटावकर आणि पोलीस शिपाई उद्धव भालेराव यांनी सदर ठिकाणी जात प्रज्योत याला ताब्यात घेतले. याबाबत कांतीलाल बाळासाहेब तांबे (वय ४८ वर्षे रा. पिंपळे जगताप ता. शिरुर जि. पुणे) यांनी शिक्रापूर पोलीस स्टेशन येथे फिर्याद दिली. शिक्रापूर पोलिसांनी प्रज्योत कांतीलाल तांबे (वय २९ वर्षे रा. बोत्रे वस्ती पिंपळे जगताप ता. शिरुर जि. पुणे) याच्या विरुद्ध गुन्हे दाखल केला असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस हवालदार भरत कोळी हे करत आहे.
पिंपळे जगताप गावची यात्रा सुरु असून पाहुणे घरी येत असतात. मात्र, ऐन यात्रेच्या दिवशीच गावामध्ये सदर युवकाने स्वतःचा बंगला आणि कार पेटवून दिल्याची घटना घडल्याने परिसरात नागरिक व ग्रामस्थ हळहळ व्यक्त करत आहे.
