पुढारी ऑनलाईन: पिंपरी चिंचवडमध्ये राज्याचे उच्च व तंत्र शिक्षण मंत्री चंद्रकांत पाटील यांच्यावर शाईफेक करण्यात आल्याने ते कमालीचे संतापले आहेत. ही शाईफेक झाल्यानंतर त्यांनी आक्रमकपणे आपली भूमिका मांडली. "अरे तुमच्यात हिंमत असेल तर समोर या. चला आपण सर्व पोलीस डिपार्टमेंटला बाजूला करु", असं पाटील यांनी म्हटलं आहे. चंद्रकांत पाटील यांच्यावर एका अज्ञात व्यक्तीने शाईफेक केली. पोलिसांनी शाईफेक करणाऱ्यांना व्यक्तीला ताब्यात घेतलंय. या घटनेवर भाजप नेत्यांकडून तीव्र संताप व्यक्त केला जातोय.
"मी कार्यक्रमाला चाललो आहे. मी सर्व कार्यक्रम करणार आहे. मी एका चळवळीतला कार्यकर्ता आणि माणूस आहे. मी कुणालाही अजिबात घाबरत नाही. तीन-तीनवेळा एखाद्या गोष्टीवर स्पष्टीकरण दिल्यानंतर आणि दिलगिरी व्यक्त केल्यानंतरही हल्ला करणं हा भ्याडपणा, अरे तुमच्यात हिंमत असेल तर समोर या. चला सर्व पोलीस प्रोटेक्शन बाजूला करु", असं आव्हान मंत्री चंद्रकांत पाटील यांनी दिलं.
"अरे काय चाललंय? एखाद्या गोष्टीचा विरोध हा लोकशाही मार्गाने करायचा असतो, पण ही झुंडशाही आहे. ही झुंडशाही सरकार सहन करणार नाही", असं देखील पाटील म्हणाले.
"या शाईफेकीवर राज्याचे मुख्यमंत्री आणि उपमुख्यमंत्री बोलतील. पण ही झुंडशाही कदापि चालणार नाही. आज समजा आम्ही आमच्या कार्यकर्त्यांना मोकळीक दिली असती तर हे केवढ्यात पडलं असतं? पण आम्ही असं करणार नाही. आमची संस्कृती आम्ही सोडणार नाही", असं चंद्रकांत पाटील म्हणाले.
"शब्दाला शब्दाने टक्कर देता येते. मी शुक्रवारी लगेचच पत्रकार परिषद घेऊन माझं असं म्हणण्याचा हेतूच नव्हता, असं स्पष्ट केलंय. खरं तर एका गिरणी कामगाराचा मुलगा इथपर्यंत जाणं हे सरंजामशाहीवाल्यांना झेपत नाहीय. त्यामुळेच हे भ्याड हल्ले चालले आहेत. उद्यापासून मला पोलिसांची सुरक्षा नसेल. तुमच्यात हिंमत असेल तर समोर या", असं आव्हान त्यांनी दिलं आहे.
