पुणे : राज्यातील प्रकल्प इतरत्र जाणे दुर्दैवी; खासदार सुप्रिया सुळे यांची टीका
पुणे; पुढारी वृत्तसेवा: महाराष्ट्र राज्य सोडून इतर राज्यांत औद्योगिक प्रकल्प जाणे, ही दुर्दैवाची गोष्ट आहे. त्यामुळे राज्यातील लाखो तरुणांच्या नोकर्‍या जाणार आहेत. हा विषय राजकीय न करण्याची राज्य सरकारला विनंती आहे, अशा शब्दांत खासदार सुप्रिया सुळे यांनी राज्य सरकारवर टीका केली. वेदांता फॉक्सकॉन प्रकल्प महाराष्ट्रातून गुजरातला हलविण्यात आल्याच्या मुद्द्यावरून खासदार सुळे यांनी राज्य सरकारवर टीका केली.
पुण्यातील सिंचन भवन येथे आल्यानंतर विविध विषयांबाबत बोलताना खासदार सुळे म्हणाल्या, ‘या विषयावर राजकारण करणे चुकीचे आहे. सर्वांनी एकत्रितपणे येऊन लढले पाहिजे. प्रकल्प कुठल्याही राज्यात जायला हरकत नाही, मात्र महाराष्ट्रातून तो जाणे, हे दुर्दैवी आहे. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी घरोघरी भेटी बंद करून इकडे लक्ष द्यावे आणि इतर दौरे रद्द करून या गंभीर प्रश्नावर चर्चा करावी. हा प्रकल्प राज्यातून गेल्याने जवळपास एक लाख नोकर्‍या जाणार असून, त्यामध्ये महाराष्ट्राचे नुकसान होणार आहे.’
दरम्यान, फॉक्सकॉन प्रकल्प गुजरातला गेल्याबद्दल राज्य सरकारचा निषेध करण्यासाठी खासदार सुळे यांच्या नेतृत्वाखाली शहर राष्ट्रवादी काँग्रेसच्या वतीने आंदोलन करण्यात आले. महाराष्ट्राला गंभीर मुख्यमंत्र्यांची गरज आहे. वेळ पडली तर दोन मुख्यमंत्री नेमावेत. तसेच फॉक्सकॉन प्रकल्प गुजरातला नेऊन महाराष्ट्र आणि मुंबईचे महत्त्व कमी करण्याचा प्रयत्न सुरू आहे. दिल्लीपुढे न झुकण्याची महाराष्ट्राची संस्कृती राहिली आहे. मात्र, शिंदे गटाचे सगळे निर्णय दिल्लीतून होत असून, ही नवी संस्कृती येत आहे. महाराष्ट्राचे हे लोण देशभर पसरत आहे, अशी टीकाही सुळे यांनी या वेळी केली.
युवा सेनेचेही राज्य सरकारविरोधात आंदोलन
महाराष्ट्रातील प्रकल्प गुजरातला गेल्याने शिंदे-फडणवीस सरकारविरोधात युवा सेनेकडून जिल्हाधिकारी कार्यालयासमोर आंदोलन करण्यात आले. एक लाख 58 हजार कोटींची गुंतवणूक आणि एक लाख तरुणांचा रोजगार पळवून नेल्याबद्दल राज्य सरकारचा या वेळी निषेध करण्यात आला.