पिंपरी, पुढारी वृत्तसेवा: खरेदीखत केल्यानंतर दिलेले तीन कोटी दहा लाखांचे चेक बाउन्स करून शेतकर्याची फसवणूक करण्यात आली. याप्रकरणी रिअल इस्टेट व्यावसायिकाच्या विरोधात पोलिसांनी गुन्हा दाखल केला आहे. हा प्रकार 13 एप्रिल 2016 ते 11 सप्टेंबर 2022 या कालावधीत नेरे येथे घडला. शांताराम दत्तात्रय कुदळे (61, रा. नेरे, ता. मुळशी) यांनी याप्रकरणी रविवारी (दि. 11) हिंजवडी पोलिस ठाण्यात फिर्याद दिली आहे. त्यानुसार, साईरंग डेव्हलपर्स अँड प्रमोटर्स प्रा. लि.चे मालक के. आर. मलिक व त्यांचा मुलगा मोहम्मद बीन शाहरुख (रा. हिंजवडी फेज 2) यांच्या विरोधात गुन्हा दाखल केला आहे.
पोलिसांनी दिलेल्या माहितीनुसार, फिर्यादी शांताराम कुदळे हे शेतकरी आहेत. त्यांची नेरे दत्तवाडी येथील शेतजमीन आरोपींनी खरेदी केली. फिर्यादी यांना व्यवहारातील एक कोटी साठ लाख रुपये एवढीच रक्कम दिली. उर्वरित तीन कोटी दहा लाख रुपये रकमेचे चेक दिले. मात्र, ते सर्व चेक बाउंस झाल्याने ती रक्कम फिर्यादी यांना न देता आरोपींनी फिर्यादीची फसवणूक केली, असे फिर्यादीत नमूद आहे. तपास हिंजवडी पोलिस करीत आहेत.
