पुणे : पुढारी वृत्तसेवा: संसाराची 55 वर्षे पूर्ण झाल्यानंतर दाखल असलेल्या घटस्फोटाच्या दाव्यात न्यायालयाने 83 वर्षीय पतीला दरमहा 25 हजार रुपयांची अंतरिम पोटगी देण्याचा आदेश 78 वर्षीय पत्नीला दिला आहे. कौटुंबिक न्यायालयातील न्यायाधीश राघवेंद्र आराध्ये यांनी हा निकाल दिला. या प्रकरणाची सविस्तर माहिती अशी की, घटस्फोट आणि पोटगीचा दावा करणारे 83 वर्षीय अर्जदार हे एका शिक्षण संस्थेचे संचालक आहेत, तर त्यांची 78 वर्षीय पत्नी संबंधित संस्थेच्या अध्यक्ष आहेत. दोघांचे 1964 मध्ये लग्न झाले आहे.
त्यांना दोन विवाहित मुली आहेत. पतीने संचालकपदाचा राजीनामा द्यावा; तसेच संस्थेतून आणि घरातून निघून जावे म्हणून पत्नी यांच्याकडून त्यांना गेली अनेक वर्षे त्रास दिला. पत्नीला दुर्धर आजार झाला, तेव्हा तक्रारदार 83 वर्षीय पतीने पत्नीची खूप काळजी घेतली. पत्नीकडून होणारा छळही त्यांनी प्रेमापोटी सहन केला. त्यांना घरात जेवण करायला ती मनाई करत असे. अर्जदाराला डायबेटीस आणि हृदयविकाराचा त्रास आहे. त्यांना वेळेवर जेवण आणि औषधे घ्यायची असतानाही पत्नीकडून त्यांची काळजी घेतली जात नव्हती, असे दाव्यात नमूद आहे. त्रासाला कंटाळून अखेर पतीने घटस्फोट मिळावा म्हणून दावा दाखल केला.
पतीला एवढी पोटगी राज्यात पहिल्यांदाच
दोघांनी एकमेकांवर विवाहबाह्य संबंध असल्याचा आरोपदेखील केला होता. पतीच्या बाजूने एवढ्या मोठ्या रक्कमेचा पोटगीचा आदेश दिल्याचे राज्यातील हे पहिलेच प्रकरण असल्याचा दावा अर्जदार पतीच्या वकील अॅड. वैशाली चांदणे यांनी केला आहे.
पोटगी कायद्याचा लाभ पुरुषांनाही
पती देखील हिंदू विवाह कायदा 1955 चे कलम 24 नुसार पोटगी मिळावी म्हणून दावा दाखल करू शकतो. केवळ पत्नीच नाही तर अन्यायग्रस्त पुरुषांना देखील मिळतो न्याय, हे या निकालातून पुन्हा एकदा स्पष्ट झाले.
हेही वाचा
