माळेगाव : पुढारी वृत्तसेवा: बारामती तालुक्यात नव्याने स्थापित झालेल्या माळेगाव नगरपंचायत सार्वत्रिक निवडणुकीच्या पार्श्वभूमीवर मंगळवारी (दि. 21) प्रारुप मतदार याद्या प्रसिद्ध करण्यात आल्या. या यादीत आपली नावे आली आहेत का ? हे पाहण्यासाठी आता नागरिकांची झुंबड उडाली आहे. गेल्या दीड वर्षांपासून माळेगाव नगरपंचायत सार्वत्रिक निवडणुकीची उत्सुकता नागरिकांना लागली होती. राज्य निवडणूक आयोगाने एप्रिल 2020 ते 2022 या कालावधीत मुदत संपलेल्या व नवनिर्वाचित 208 नगरपरिषदा व 13 नगरपंचायत अशा एकूण 221 सदस्यपदांच्या सार्वत्रिक निवडणुकीसाठी हा मतदार यादीचा कार्यक्रम जाहीर केल्याने आता या निवडणूक प्रक्रियेला वेग आला आहे.
प्रभागनिहाय आरक्षण निश्चित करण्यात आल्यानंतर आता प्रारूप मतदार याद्या प्रसिद्ध करण्यात आल्या आहेत. तसेच 27 जूनपर्यंत हरकती व सूचना दाखल करण्याचा कालावधी असल्याने प्रशासनाने नागरिकांना प्रारूप मतदार याद्या पाहता याव्यात यासाठी त्या कार्यालयासमोर लावल्या आहेत. त्यामुळे अनेक नागरिक व इच्छुक उमेदवार आपली नावे इतर प्रभागात गेली तर नाही ना? हे पाहण्यासाठी गर्दी करत असल्याचे दिसून येत आहे. दरम्यान माळेगाव नगरपंचायत निवडणुकीचे बिगुल लवकरच वाजणार असल्याचे चित्र स्पष्ट दिसत असल्याने इच्छुक उमेदवार कोणता प्रभाग फायदेशीर ठरेल याची चाचपणी करू लागले असल्याचे दिसून येत आहे.
माळेगाव नगरपंचायत निवडणुकीकरिता प्रसिद्ध करण्यात आलेल्या प्रारूप मतदारयाद्यांच्या हरकती व सूचना दाखल करण्याच्या कालावधीनंतर दि. 1 जुलै रोजी प्रभागनिहाय अंतिम मतदार यादी प्रसिद्ध केली जाणार आहे.
– स्मिता काळे, मुख्याधिकारी, माळेगाव
हेही वाचा
