पिंपरी : पुढारी वृत्तसेवा : ज्यांच्यामुळे राज्यसभा निवडणुकीत भाजपचा विजय सुकर झाला ते आमदार लक्ष्मण जगताप यांची नवनिर्वाचित खासदार धनंजय महाडीक यांनी शनिवारी (दि. 11) रात्री पिंपळेगुरव येथील निवासस्थानी येऊन भेट घेतली. भाऊ, तुमच्यामुळे मी पुन्हा एकदा खासदार होऊ शकलो.
तुमची पक्षनिष्ठा, लढवय्येपणा आणि प्रबळ इच्छाशक्ती भाजपच नाही, तर सर्वच राजकीय पक्षाच्या कार्यकर्त्यांना कायम प्रेरणा देणारी आहे, अशा शब्दांत खासदार महाडीक यांनी आमदार जगताप यांचे आभार मानले. तुम्हाला उत्तम आरोग्य लाभो. पिंपरी-चिंचवडमधील जनतेच्या सेवेसाठी तुम्ही लवकरात लवकर पुन्हा नव्या जोमाने काम सुरू करा. आपल्याला पिंपरी-चिंचवड महापालिकेवर पुन्हा एकदा भाजपचा भगवा फडकवायचा आहे, अशा भावनाही त्यांनी व्यक्त केली.
यावेळी आमदार लक्ष्मण जगताप यांचे बंधू, माजी नगरसेवक व भाजपचे चिंचवड विधानसभा निवडणूक प्रमुख शंकर जगताप, विजय जगताप व कुटुंबातील सर्व सदस्य उपस्थित होते. मुंबईत विजयाचा जल्लोष केल्यानंतर भाजपचे नवनिर्वाचित खासदार धनंजय महाडीक शनिवारी रात्री आमदार जगताप यांनी पिंपळेगुरव येथील निवासस्थानी भेट दिली.
आमदार जगताप व त्यांच्या कुटुंबीयांशी संवाद साधत तब्येतीची विचारपूस केली. जगताप कुटुंबीयांच्या वतीने नवनिर्वाचित खासदार धनंजय महाडीक यांचे औक्षण करून अभिनंदन करण्यात आले. लक्ष्मणभाऊंमुळे दुसर्यांदा खासदार होण्याचा माझा मार्ग सुकर झाला. भाऊ, मी तुमच्यामुळेच पुन्हा एकदा खासदार होऊ शकलो. तुमची पक्षनिष्ठा, लढवय्येपणा आणि प्रबळ इच्छाशक्ती केवळ भाजपसाठीच नाही, तर सर्वच राजकीय पक्षांच्या कार्यकर्त्यांसाठी आदर्श असल्याचे त्यांनी सांगितले.
