पिंपरी : पुढारी वृत्तसेवा : बनावट कागदपत्रांच्या आधारे फायनान्स कंपनीची 22 कोटी 74 लाख 43 हजार 763 रुपयांचा अपहार केला. हा प्रकार सन 2018 ते सन 2020 या कालावधीत चर्होली बुद्रुक येथील सुखकर्ता इलेक्ट्रॉनिक या दुकानात घडला. पवन कुमार गोकुळ चौधरी (30, रा. वाघोली) यांनी दिघी पोलीस ठाण्यात फिर्याद दिली आहे. त्यानुसार, प्रितेश पोपट शिवले (रा. चर्होली) आणि त्यांचे अनोळखी सेल्स एक्झिक्युटिव्ह यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी शिवले याचे सुखकर्ता इलेक्ट्रॉनिक नावाने दुकान आहे. आरोपी शिवले आणि अन्य सेल्स एक्झिक्युटिव्ह यांनी मिळून ग्राहकांना टीव्हीएस क्रेडिट सर्व्हिसेस लिमिटेड या फायनान्स कंपनीतून कर्ज उपलब्ध करून देणार असल्याचे सांगितले. त्यासाठी नागरिकांकडून कागदपत्र घेऊन त्यांच्या नावावर इलेक्ट्रॉनिक वस्तू घेतल्याचे फायनान्स कंपनीला भासवले. अशा प्रकारे खोटी कागदपत्रे ऑनलाईन अपलोड करून आरोपींनी दोन वर्षात 22 कोटी 74 लाख 43 हजार 763 रुपयांचा अपहार केला. हा प्रकार उघडकीस आल्यानंतर दोन वर्षांनी गुन्हा दाखल करण्यात आला आहे. दिघी पोलिस तपास
करीत आहेत.
