पुणे : जऊळकेत महिलेवर बिबट्याचा हल्ला, खेड तालुक्यात दोन दिवसांतील तिसरी घटना

राजगुरूनगर : पुढारी वृत्तसेवा

जऊळके (ता. खेड) येथे महिलेवर बिबट्याने हल्ला केला आहे. यामुळे महिला गंभीर जखमी झाली आहे. जऊळकेत गुरुवारी (दि. १२) सकाळी सहा वाजता घडलेल्या या घटनेत लता शिवाजी बोऱ्हाडे (वय ४२) ही महिला रक्तबंबाळ झाली आहे. तिची अवस्था गंभीर असल्याचे वनविभागाकडून सांगण्यात आले.

दोन दिवसांपूर्वी म्हणजे मंगळवारी (१०) जऊळके लगतच्या रेटवडी गावात दोन बिबट्यांनी दीड तासाच्या अंतराने दोन वेगवेगळ्या ठिकाणी दोन महिलांवर जीवघेणा हल्ला चढवला होता. यातील एक महिला पुण्यातील ससून रुग्णालयात अत्यवस्थ स्थितीत असताना याच परिसरात आज सकाळी दुसरा हल्ला झाल्याने परिसरातील नागरिक पुरते घाबरून गेले आहेत.

दोन दिवसांपूर्वी झालेल्या हल्ल्यानंतर बिबट्याची माहिती घेऊन उपाययोजना करण्यासाठी राजगुरूनगर वनविभाग व माणिकडोह येथील वनविभागाच्या अधिकारी पथकाने परिसर पिंजून काढला. तसेच बिबट्याला जेरबंद करण्यासाठी दोन ठिकाणी पिंजरा लावला. मात्र बिबट्या हाती येण्याऐवजी दुसरा हल्ला झाल्याने वनविभागाचे प्रयत्न वाया गेले आहेत.

गुरुवारी सकाळी घटनेची माहिती मिळाल्यानंतर वनपरिक्षेत्र अधिकारी पी एस रौन्धळ, दत्तात्रय फापाळे, शिवाजी राठोड, संदीप अरुण असे पथक या ठिकाणी पोहोचले. ग्रामस्थांनी तोपर्यंत जखमी महिलेला उपचारासाठी चांडोली ग्रामीण रुग्णालयात दाखल केले होते.
नागरिक मात्र भीतीने गांगरून गेले आहेत. रात्रीची दहशत आहेच. मात्र आता दिवसा बाहेर पडायला नागरिक घाबरू लागले आहेत.
चासकमान धरणाचा डावा कालवा या परिसरातून जातो. पाण्याची मुबलकता असल्याने शेतकऱ्यांनी बागायती पिके घेतली आहेत. लोडशेडिंगमुळे पिकांना रात्री पाणी द्यावे लागते. मात्र या घटनांमुळे शेतकरी हवालदिल झाले आहेत. वनविभागाच्या अधिकाऱ्यांना नागरिकांच्या रोषाला सामोरे जावे लागत आहे.

दोन दिवसांत घडलेल्या घटना व नागरिकांच्या माहितीनुसार या परिसरात दोन बिबट्यांचा वावर आढळुन येत आहे. नागरिकांमध्ये भीतीचे वातावरण आहे. वनविभागाच्या अधिकाऱ्यांना तातडीने उपाययोजना कराव्यात अशा सुचना दिल्या आहेत. जीवघेणा हल्ला नागरिक सहन करत आहेत. वनप्रशासनाची दिरंगाई आढळली तर कडक कारवाई करावी लागेल.

गावाच्या भर वस्तीत जिल्हा परिषद शाळा असुन समोर महिलेचे घर आहे. सकाळी उठून घराबाहेर आल्याबरोबर बिबट्याने तिच्यावर हल्ला चढवला.