पुणे : पुढारी वृत्तसेवा
कोरोना आल्यापासून शहरात आतापर्यंत 6 लाख 60 हजार जण बाधित झाले. मात्र, त्यापैकी 98 टक्के रुग्ण ठणठणीत बरे झाले आहेत.
विलगीकरण, औषधोपचार आणि आरोग्य खात्याकडून करण्यात आलेला पाठपुरावा यामुळे रुग्ण बरे होण्याचे प्रमाण अधिक असल्याचे दिसून आले आहे.
पुणे शहरात 9 मार्च 2020 ते 28 फेब्रुवारी 2022 यादरम्यान सहा लाख 60 हजार 411 जणांना कोरोनाचा संसर्ग झाला. त्यापैकी 6 लाख 49 हजार 921 (98 टक्के) रुग्ण ठणठणीत बरे झाले आहेत. सध्या शहरात 1326 रुग्ण अॅक्टिव्ह आहेत. यापैकी 139 रुग्णालयांत, तर 1187 रुग्ण गृहविलगीकरणात आहेत. आतापर्यंत नऊ हजार 345 कोरोना रुग्णांचा मृत्यू झाला. त्यातील बहुतांश बाधित हे सहव्याधी असणारे होते, असे निष्कर्ष या विश्लेषणातून काढण्यात आले आहेत.
सुरुवातीला पुण्यात रुग्ण आढळला असता, त्या वेळी नेमका काय उपचार आहे, हेदेखील माहीत नव्हते. मात्र, रुग्णांच्या लक्षणांवर आधारित उपचार सुरू झाले होते. भारतीय वैद्यक संशोधन परिषदेने जी मार्गदर्शक तत्त्वे सांगितली, त्यानुसार उपचाराची दिशा निश्चित करण्यात आली. त्यानंतर दुसरी आणि तिसरीही लाट आली. त्याचा युद्धपातळीवर मुकाबला करण्यात डॉक्टर्स यशस्वी ठरले.
शहरातील तीन खासगी रुग्णालयांकडून पुणे महापालिकेच्या लसीकरण विभागाला तब्बल 62 हजार 600 कोविशिल्डचे डोस मोफत देण्यात आले. या डोसची मुदत संपण्याची वेळ जवळ आल्याने हे डोस देण्यात आले असून, त्यापैकी 459 कुप्यांची मुदत 28 फेब्रुवारीला संपल्याने त्या नष्ट करण्यात येणार आहेत.
शहरातील ज्युपिटर हॉस्पिटलने सर्वाधिक 50 हजार डोस दिले आहेत. पूना हॉस्पिटलने 11 हजार 600 तर इनलॅक्स बुधरानी हॉस्पिटलने 500 डोस मोफत दिले आहेत. त्यापैकी 479 कुप्यांची मुदत 28 फेब्रुवारीला संपली. त्या महापालिकेकडून नष्ट करण्यात येणार असल्याची माहिती लसीकरण विभागाचे प्रमुख डॉ. सूर्यकांत देवकर यांनी दिली. मुदत संपलेल्या कुप्यांपैकी वारजे कर्वेनगर, वडगाव शेरी, हडपसर, मुंढवा आणि धनकवडी सहकारनगर या चार क्षेत्रीय कार्यालयांना प्रत्येकी 50 कुप्या देण्यात आल्या आहेत. उरलेल्या 8 क्षेत्रीय कार्यालयांना देण्यात आल्या आहेत. काहींची 5 मार्च आणि 11 मार्च रोजी संपुष्टात येणार आहे.
