पुणे : पुढारी वृत्तसेवा
संघटीत गुन्हेगारी कायद्यान्वये (मोक्का) व खुनाचा प्रयत्न तसेच खंडणीसाठी मारहाण केल्याप्रकरणात फरार असलेल्या निलेश घायवळ टोळीतील एकाला गुन्हे शाखेच्या युनिट 3 मोरगाव येथून अटक केली.
गणेश सतीश राऊत (31, रा. ज्ञानेश्वर कॉलनी, डीपीरोड, कोथरूड) असे अटक करण्यात आलेल्याचे नाव आहे. राऊतवर कोथरूड पोलिस ठाण्यात खुनाचा प्रयत्न, खंडणी, मारहाण धमकावणे व हत्यार बाळल्याप्रकणात मोक्काची कारवाई करण्यात आली आहे.
पोलिस आयुक्त अमिताभ गुप्ता यांनी शहरातील गुन्ह्यांना प्रतिबंध व्हावा या करिता फरार आरोपींचा शोध घेण्याच्या सुचना केल्या आहेत. 8 फेब्रुवारी रोजी वरिष्ठ पोलिस निरीक्षक अभय महाजन, उपनिरीक्षक दत्तात्रय काळे व पोलिस अमंलदार आरोपींचा शोध घेत पोलिस शिपाई राकेश टेकावडे यांना कोथरूडच्या मोक्काच्या गुन्ह्यात फरार असलेल्या गणेश राऊत विषयी माहिती मिळाली. तो मोरगाव येथील एसटीस्टँड येथे येणार असल्याची माहिती मिळाली. त्यानुसार एसटी स्टँडजवळ सापळा लावून राऊत याला युनिट 3 ने ताब्यात घेतले.
चौकशीत त्याचा गुन्ह्यात सहभाग असल्याचे निष्पन्न झाले असून त्याला पुढील तपासासाठी कोथरूड पोलिसांच्या ताब्यात देण्यात आले आहे. उपायुक्त श्रीनिवास घाडगे, सहायक पोलिस आयुक्त गजानन टोम्पे, युनिट 3 चे वरिष्ठ निरीक्षक अभय महाजन, अमंलदार महेश निंबाळकर, संतोष क्षिरसागर, राजेंद्र मारणे, राकेश टेकावडे यांनी ही कारवाई करत राऊतला बेड्या ठोकल्या.
