विक्रमगड: दरवर्षीप्रमाणे यंदाही तालुक्यात विविध ठिकाणी नवरात्रोत्सव मोठ्या भक्तिभावाने आणि उत्साहात साजरा करण्याची तयारी सुरू असून गरबा, दांडिया तसेच विविध सांस्कृतिक कार्यक्रमांचे नियोजन करण्यात येत आहे.
नवरात्रोत्सवासाठी दुर्गामूर्ती तयार करणारे कारागीर आणि विक्रेते सध्या अंतिम टप्प्यातील कामांमध्ये व्यस्त असून मूर्तींना आकर्षक रंगसंगती, अलंकार आणि सजावट करून अंतिम रूप देण्याचे काम युद्धपातळीवर सुरू आहे.
तालुक्यातील अनेक मूर्ती विक्रेत्यांच्या कार्यशाळांमध्ये दुर्गामूर्तींवर शेवटचा हात फिरताना दिसत असून ग्राहकांच्या पसंतीनुसार विविध आकारांच्या आणि आकर्षक मूर्ती तयार करण्यात आल्या आहेत. यंदा पारंपरिक स्वरूपाबरोबरच पर्यावरणपूरक मूर्तींनाही चांगली मागणी असल्याचे विक्रेत्यांनी सांगितले.
नवरात्रोत्सव जवळ येत असल्याने भाविकांकडून मूर्तींची निवड आणि बुकिंग सुरू झाले असून बाजारपेठेतही उत्साहाचे वातावरण आहे. नवरात्रोत्सवाच्या स्वागतासाठी मंडळे, ग्रामस्थ आणि युवक वर्ग तयारीला लागला असून भक्ती, संस्कृती आणि उत्सवाचा रंग चढू लागला आहे. बाजारपेठांमध्येही नवरात्रौत्सवाच्या विविध वस्तू दाखल झाल्या असून महिला खरेदीसाठी गर्दी करत आहेत.
