विक्रमगड : विक्रमगड तालुक्यात गेल्या दोन-तीन दिवसांपासून ढगाळ वातावरण निर्माण झाले असून, अवकाळी पावसाची शक्यता वर्तवली जात आहे. या बदलत्या हवामानामुळे तालुक्यातील शेतकरी वर्गात चिंतेचे वातावरण पसरले आहे. विशेषतः आंबा व काजू बागायतींना याचा मोठा फटका बसण्याची शक्यता असून, रब्बी हंगामातील कडधान्य पिकेही हातून जाण्याची भीती व्यक्त केली जात आहे.
सध्या आंबा व काजू या पिकांवर मोहोर व फळधारणा होण्याचा महत्त्वाचा टप्पा सुरू आहे. या काळात जर अवकाळी पाऊस झाला, तर मोहोर गळणे, बुरशीजन्य रोगांचा प्रादुर्भाव वाढणे आणि उत्पादनात मोठी घट होण्याची शक्यता आहे. मागील काही वर्षांतील अनुभव लक्षात घेता, अशा हवामान बदलांचा थेट परिणाम शेतकऱ्यांच्या उत्पन्नावर होत असल्याचे दिसून आले आहे. याचबरोबर हरभरा, वाल, उडीद, चवळी आदी कडधान्य पिके काढणीच्या किंवा शेवटच्या टप्प्यात असताना पाऊस झाल्यास दाण्याची गुणवत्ता घसरू शकते. ओलाव्यामुळे पीक वाया जाण्याचा धोका असून, शेतकऱ्यांचे आर्थिक नुकसान होण्याची शक्यता नाकारता येत नाही.
दरम्यान, शेतकऱ्यांप्रमाणेच विटभट्टी व्यावसायिकही या ढगाळ वातावरणामुळे चिंतेत सापडले आहेत. विटा वाळविण्याचे काम सध्या सुरू असताना पावसाने अडथळा निर्माण झाल्यास तयार विटांचे नुकसान होऊ शकते. त्यामुळे उत्पादन खर्च वाढण्याची आणि कामकाज ठप्प होण्याची भीती व्यावसायिकांकडून व्यक्त केली जात आहे.
कृषी विभागाकडून शेतकऱ्यांना हवामानाचा अंदाज लक्षात घेऊन योग्य खबरदारी घेण्याचे आवाहन करण्यात येत आहे. गरज असल्यास प्रतिबंधात्मक फवारणी, काढणीयोग्य पिकांची तातडीने काढणी आणि बागायती पिकांमध्ये संरक्षणात्मक उपाययोजना करण्याचा सल्ला देण्यात आला आहे.
एकूणच, विक्रमगड तालुक्यातील बदलत्या हवामानामुळे शेती व संबंधित व्यवसायांवर संकटाचे सावट असून, सर्वांचे लक्ष आता पुढील काही दिवसांत हवामान कसे राहते याकडे लागले आहे.
