मोखाडा (पालघर) : पालघर जिल्ह्यात एकीकडे राजकीय वातावरण तापताना दिसत आहे महायुतीतील प्रमुख घटक पक्ष एकमेकांची प्रतिनिधी फोडताना दिसत आहे. तर आता अचानक पणे राष्ट्रवादी काँग्रेस शरदचंद्र पवार गटाची मोखाडा तालुका कार्यकारणी बरखास्त केली असल्याची माहिती जिल्हाध्यक्ष तथा माजी आमदार सुनील भुसारा यांनी माध्यमांना दिली आहे. यामुळे येणार्या निवडणुकीत राष्ट्रवादी काँग्रेस शरद पवार गट भाकरी फिरवणार का या चर्चांना उधान आले आहे.
ऐन निवडणुकीच्या तोंडावर कार्यकारणी बरखास्त करून नवीन नेमणूक होणार का असाही सवाल या ठिकाणी उपस्थित होत आहे मात्र यामुळे तालुक्यातील राजकीय वातावरण ढवळून निघाले असून महायुती बरोबरच आता महाविकास आघाडीच्या बैठकांना आणि राजकीय घडामोडींना सुद्धा गती निर्माण झाल्याचे दिसून येत आहे.
माजी आमदार सुनील भुसारा हे सध्या राष्ट्रवादी काँग्रेस पक्ष शरद पवार गटाच्या प्रदेश उपाध्यक्षपदी त्यांची निवड झाली आहे यानंतर लवकरच पालघर जिल्ह्यात जिल्हा कार्यकारिणी सुद्धा नवीन होईल की काय याबाबत अनेक चर्चा राजकीय गोटातून होत असताना. काल अचानक पणे भुसारा यांनी मोखाडा तालुक्यातील राष्ट्रवादी काँग्रेस पक्षाची कार्यकारणी बरखास्त करत असल्याचे जाहीर केले यामुळे आता कार्यकारणी बरखास्त झाल्यामुळे तालुका कार्यकारणी मध्ये असलेले तालुकाध्यक्ष, शहर अध्यक्ष ,ओबीसी सेल, युवक अध्यक्ष विद्यार्थी अध्यक्ष आधी संपूर्ण कार्यकारणीच रद्द झाल्याचे सांगण्यात आले असून गणेश चतुर्थी दिवशी नवीन कार्यकारिणीचा श्री गणेशा करणार असल्याची माहिती सुद्धा यावेळी भुसारा यांनी दिली.
अवघ्या काही महिन्यावर पंचायत समिती जिल्हा परिषद नगरपरिषदांच्या निवडणुका येऊन ठेपले आहेत अशावेळी संपूर्ण जिल्ह्यात पळवा पळवी चे वातावरण आहे अशावेळी राष्ट्रवादी काँग्रेस पक्ष शरद पवार गट हा सुद्धा महाविकास आघाडीमध्ये मोठ्या ताकतीने लढण्यासाठी सज्ज आहे मात्र अनेक कार्यकारणी जुने आहेत अशावेळी नवीन चेहर्यांना संधी देणे काम करणार्या कार्यकर्त्यांना पक्षाचे पद देणे या गोष्टी करून पक्षाला पुन्हा उभारी देण्यासाठी नवीन कार्यकारणी आवश्यक असल्याचे सांगत भुसारा यांनी एक प्रकारे पक्ष ढवळून काढणार असल्याचे सुतवाच या माध्यमातून केले असल्याचे दिसून येत आहे यामुळे आता कोणते नवीन चेहरे आणि कोणते पदाधिकारी पक्षात पुन्हा सक्रिय होऊन काम करणार आहेत हे काही दिवसातच दिसून येणार आहे.
