नाशिक : पुढारी ऑनलाइन डेस्क | महाराष्ट्र राज्य माध्यमिक व उच्च माध्यमिक शिक्षण मंडळाने जून-जुलै 2025 मध्ये होणाऱ्या इयत्ता दहावी व बारावीच्या पुरवणी परीक्षांचे वेळापत्रक जाहीर करण्यात आले आहे.
बारावीची लेखी परीक्षा 24 जून ते 16 जुलै दरम्यान, दहावीची लेखी परीक्षा 24 जून ते 8 जुलै दरम्यान आयोजित करण्यात आली आहे. राज्य मंडळाच्या https://www.mahahsscboard.in/ अधिकृत संकेतस्थळावर परीक्षांचे वेळापत्रक उपलब्ध आहे. याच बरोबर, शैक्षणिक वर्ष 2025-26 साठी अकरावीच्या ऑनलाईन प्रवेश प्रक्रियेसाठी सोमवार (दि.26) पासून सुरूवात झाली असून, अर्ज भरण्याची अंतिम तारीख ३ जून आहे. अंतिम गुणवत्ता यादी ८ जूनला प्रकाशित होईल.
राज्य मंडळाने ५ मे रोजी बारावीचा, तर १३ मे रोजी दहावीचा निकाल जाहीर केला. या परीक्षांतील अनुत्तीर्ण, एटीकेटी प्राप्त विद्यार्थी, श्रेणी सुधार करू इच्छिणारे विद्यार्थी यांना संधी मिळण्यासाठी पुरवणी परीक्षा घेतली जाणार आहे. आतापर्यंत पुरवणी परीक्षा जुलै-ऑगस्टमध्ये घेतली जात होती. मात्र, यंदा ही परीक्षा लवकर घेतली जाणार आहे.
राज्य मंडळाने जाहीर केलेल्या वेळापत्रकानुसार, 24 जून ते 11 जुलै या कालावधीत बारावीची प्रात्यक्षिक, तोंडी, अंतर्गत मूल्यमापन, तसेच व्यावसायिक अभ्यासक्रम प्रात्यक्षिक परीक्षा घेतली जाणार आहे. बारावीच्या माहिती तंत्रज्ञान आणि सामान्यज्ञान या विषयांची परीक्षा ऑनलाइन पद्धतीने अनुक्रमे 15 जून, 16 जून रोजी घेतली जाणार आहे. तर 24 जून ते 8 जुलै या कालावधीत दहावीचे प्रात्यक्षिक, तोंडी, अंतर्गत मूल्यमापन केले जाणार आहे.
