नाशिक : पुढारी वृत्तसेवा
काँग्रेसच्या 'संघटन सृजन अभियान' अंतर्गत जिल्हा काँग्रेस कमिटी अध्यक्षांची निवड आणि नियुक्ती प्रक्रियेचा भाग म्हणून नाशिक येथे १० दिवशीय निवासी प्रशिक्षण कार्यक्रमाचे आयोजन करण्यात आले आहे.
२४ ऑगस्ट ते २ सप्टेंबरपर्यंत हे शिबीर असेल. अखिल भारतीय काँग्रेस कमिटीच्या प्रशिक्षण विभागाच्या नेतृत्वाखाली हे शिबीर आयोजित करण्यात आले आहे. लोकसभेतील विरोधी पक्षनेते राहुल गांधी सर्व प्रशिक्षणार्थींना विशेष मार्गदर्शन करणार आहेत.
प्रशिक्षण शिबिरात आगामी काळातील काँग्रेस पक्षाची दृष्टी आणि दिशा, पक्षासमोरील आव्हाने, संघटनात्मक तयारी, काँग्रेसची विचारधारा आणि देशाच्या राजकारणातील पक्षाची भूमिका यावर सविस्तर चर्चा होणार आहे. नव्या पिढीतील कार्यकर्त्यांच्या मनातील प्रश्न, अपेक्षा, मुद्दे आणि राजकीय दृष्टिकोनास महत्त्व दिले जाणार आहे.
राज्य आणि देशपातळीवरील विविध क्षेत्रांतील मान्यवर, अभ्यासक आणि तज्ज्ञ शिबिरात मार्गदर्शन करतील. राष्ट्रीय वॉर रूमचे अध्यक्ष खासदार शंतनू सेन तीन दिवस विशेष सत्रे घेणार आहेत. प्रदेशाध्यक्ष हर्षवर्धन सपकाळ यांच्यासह काँग्रेसचे राष्ट्रीय व प्रदेशपातळीवरील वरिष्ठ नेतेही प्रशिक्षणार्थींशी संवाद साधतील. सचिन राव यांच्या नेतृत्वाखालील प्रशिक्षण टीम प्रशिक्षणाची धुरा सांभाळणार आहे.
'नवी पिढी, नवे नेतृत्व आणि मजबूत संघटन' या व्यापक दृष्टिकोनातून या प्रशिक्षणाची रचना करण्यात आली आहे. बदलत्या सामाजिक आणि राजकीय परिस्थितीचा अभ्यास करताना जनतेशी प्रत्यक्ष संपर्क, संघटनात्मक कौशल्य, वैचारिक स्पष्टता आणि नेतृत्वक्षमता या चारही बाबी विकसित करण्याचा प्रयत्न या प्रशिक्षणातून केला जाणार आहे. प्रशिक्षणार्थी दररोज श्रमदानात सहभागी होतील.
ग्रामीण भागातील वास्तव समजून घेण्यासाठी 'मनरेगा'अंतर्गत प्रत्यक्ष कामाचा अनुभव देण्यात येणार आहे. श्रम, संघर्ष, ग्रामीण अर्थव्यवस्था आणि जनतेच्या दैनंदिन प्रश्नांचा प्रत्यक्ष अनुभव घेण्यावरही या प्रशिक्षणात भर राहणार आहे, अशी माहिती प्रदेश काँग्रेसने दिली आहे.
राहुल गांधी नाशिक दौऱ्यादरम्यान रामकुंड परिसराला भेट देण्याची शक्यता आहे. सध्या रामकुंड परिसरात सिंहस्थ कुंभमेळ्याचे कामे सुरू आहेत. त्याची पाहणी राहुल गांधी यांच्याकडून केली जाण्याची शक्यता आहे. स्थानिक पदाधिकाऱ्यांकडून राहुल गांधींच्या रामकुंड परिसराला भेटीचे नियोजन केले जात असले तरी, अद्याप त्यांच्या या भेटीबाबत दुजोरा मिळालेला नाही.
२४ ऑगस्टपासून नाशिकमध्ये काँग्रेसचे 'मंथन'; जिल्हाध्यक्षांच्या निवडीसाठी निवासी प्रशिक्षण.
नाशिक दौऱ्यात राहुल गांधी रामकुंड परिसराला भेट देणार? सिंहस्थ कुंभमेळा कामांची पाहणी करण्याची शक्यता.
काँग्रेसचे 'संघटन सृजन अभियान'! नाशिकमध्ये रंगणार नव्या नेतृत्वाच्या घडणीची कार्यशाळा.
प्रशिक्षणार्थी करणार 'मनरेगा'चे काम आणि श्रमदान; नाशिकमध्ये काँग्रेसच्या शिबिराचे हटके नियोजन.
'नवी पिढी, नवे नेतृत्व अन् मजबूत संघटन'; नाशिकमधील १० दिवशीय शिबिरावर काँग्रेसचा भर.
हर्षवर्धन सपकाळ यांच्यासह राष्ट्रीय नेते नाशिकमध्ये; काँग्रेस कार्यकर्त्यांशी साधणार थेट संवाद.
खासदार शंतनू सेन घेणार ३ दिवसांचे विशेष सत्र; नाशिकमधील काँग्रेस शिबिराचे वेळापत्रक जाहीर.
सचिन राव यांच्या टीमकडे प्रशिक्षणाची धुरा; आगामी निवडणुकांच्या पार्श्वभूमीवर नाशिकमध्ये 'रणनिती'.
ग्रामीण वास्तव जाणून घेण्यासाठी काँग्रेस नेत्यांचे 'फील्ड वर्क'; नाशिकमधील शिबिराची वैशिष्ट्ये.
