Nashik Conversion Case: नाशिकमधील टीसीएस (TCS) कंपनीशी संबंधित धर्मांतर प्रकरणाने आता अधिक गंभीर वळण घेतले आहे. या प्रकरणातील मुख्य आरोपींपैकी एक, तौसीफ अत्तार आणि एका पीडित हिंदू तरुणाचा धर्मांतर प्रक्रियेशी संबंधित असल्याचा दावा केला जाणारा एक धक्कादायक व्हिडिओ समोर आला आहे. या व्हिडिओमुळे नाशिकसह राज्यभरात खळबळ उडाली असून, तपास यंत्रणांसमोर आता या प्रकरणाचे संपूर्ण सत्य बाहेर काढण्याचे मोठे आव्हान उभे ठाकले आहे.
मिळालेल्या माहितीनुसार, या व्हिडिओमध्ये एक हिंदू तरुण केशरी रंगाचा कुर्ता परिधान केलेला दिसत आहे. संबंधित तरुणाने आरोप केला आहे की, आरोपी तौसीफ अत्तार याने त्याच्यावर प्रचंड मानसिक दबाव टाकला होता. त्याला केवळ नमाज पठण करण्यासाठीच नव्हे, तर 'रोजा' ठेवण्यासाठी आणि 'बीफ' (गोमांस) खाण्यासाठी देखील भाग पाडण्यात आले होते. इतकेच नव्हे, तर हिंदू देवदेवतांबद्दल आक्षेपार्ह बोलण्यासही प्रवृत्त केल्याचा गंभीर दावा या पीडित तरुणाने केला आहे.
काही दिवसांपूर्वी पीडित तरुण आणि आरोपी तौसीफ यांचे काही फोटो समोर आले होते. मात्र, आता थेट व्हिडिओ समोर आल्याने हा 'लॅण्ड जिहाद' किंवा संघटित धर्मांतराचा प्रकार असल्याच्या संशयाला बळ मिळाले आहे. व्हिडिओमध्ये धर्मांतराची प्रक्रिया कशा प्रकारे पार पाडली जात होती, याचे चित्रण असल्याचे सांगितले जात आहे. आरोपी तौसीफ अत्तार सध्या पोलीस कोठडीत असून, पोलीस या व्हिडिओची तांत्रिक तपासणी करत आहेत.
नाशिक पोलिसांनी या प्रकरणी गुन्हा दाखल केला असून, कंपनीतील इतर कर्मचारी किंवा वरिष्ठ अधिकाऱ्यांचा यात सहभाग आहे का, याचा शोध घेतला जात आहे. या प्रकरणातील दुसरी मुख्य संशयित निदा खान सध्या फरार असून, तिने अटकपूर्व जामिनासाठी न्यायालयात धाव घेतली आहे. या व्हिडिओतील पुराव्यांमुळे आता पोलिसांना तौसीफची अधिक सखोल चौकशी करता येणार आहे.
