नाशिक : पुढारी वृत्तसेवा
गणेशोत्सव २०२६ शांततेत, सुरक्षित आणि निर्विघ्न वातावरणात पार पडावा तसेच शहरातील सार्वजनिक शांतता व कायदा-सुव्यवस्था अबाधित राहावी, यासाठी नाशिक शहर पोलिसांनी व्यापक प्रतिबंधात्मक उपाययोजना सुरू केल्या आहेत.
या कारवाईचा भाग म्हणून परिमंंडळ - १ आणि परिमंडळ - २ अंतर्गत विविध पोलीस ठाण्यांच्या हद्दीत एकूण ४०२ व्यक्तींवर प्रतिबंधात्मक कारवाई करण्यात आली असून, त्यांना दि. २७ सप्टेंबर २०२६ पर्यंत नाशिक शहर पोलीस आयुक्तालय हद्दीत वास्तव्य करण्यास मनाई करण्यात आली आहे.
पोलीस आयुक्त संदीप कर्णिक यांच्या मार्गदर्शनाखाली ही कारवाई करण्यात आली. गणेशोत्सवाच्या काळात शांतता भंग, सार्वजनिक उपद्रव अथवा कायदा - सुव्यवस्थेला बाधा निर्माण होऊ नये, यासाठी संभाव्य उपद्रवींवर प्रतिबंधात्मक कारवाईचा बडगा उगारण्यात आला आहे. परिमंंडळ - १ मध्ये १२७ जणांवर कारवाई करण्यात आली.
पोलीस उपायुक्त मोनिका राऊत यांच्या मार्गदर्शनाखाली आडगाव ७, पंचवटी २२, म्हसरूळ १०, भद्रकाली २४, सरकारवाडा ११, गंगापूर २२ आणि मुंबई नाका ३१ जणांवर कारवाई करण्यात आली. परिमंडळ - २ मध्ये २७५ जणांवर कारवाई झाली. पोलीस उपायुक्त किशोर काळे यांच्या मार्गदर्शनाखाली अंबड ४०, सातपूर ५३, इंदिरानगर ३६, एमआयडीसी २५, नाशिकरोड ४२, उपनगर ४६ आणि देवळाली कॅम्प ३३ जणांवर प्रतिबंधात्मक कारवाई करण्यात आली.
गणेशोत्सव काळात सार्वजनिक शांतता भंग करणाऱ्या, कायदा - सुव्यवस्थेला बाधा निर्माण करणाऱ्या तसेच नागरिकांच्या सुरक्षिततेला धोका निर्माण करणाऱ्या व्यक्तींवर कठोर प्रतिबंधात्मक कारवाई सुरूच राहणार असल्याचे पोलिसांकडून स्पष्ट करण्यात आले आहे.
परिमंडळ - १ : १२७
परिमंडळ - २ : २७५
एकूण प्रतिबंधात्मक कारवाई : ४०२ व्यक्ती
हद्दपारीची मुदत : २७ सप्टेंबर २०२६ पर्यंत
