येवला : येवला-नांदगाव रस्त्यावर आज पहाटेच्या सुमारास लक्झरी बस उलटली. चालकाचे नियंत्रण सुटल्याने प्रवाशांनी भरलेली लक्झरी बस रस्त्यावर उलटली. या अपघातात एका प्रवाशाचा जागीच मृत्यू झाला.
अन्य प्रवासी किरकोळ जखमी झाले असून त्यांना तातडीने उपचारासाठी नांदगाव येथील ग्रामीण रुग्णालयात दाखल करण्यात आले आहे. त्यांच्यावर सध्या उपचार सुरू करण्यात आले आहेत.
मिळालेल्या प्राथमिक माहितीनुसार, अपघातग्रस्त लक्झरी बस ही मध्य प्रदेशातील होती. पहाटेच्या सुमारास सोमठाणे घाटामध्ये येवला-नांदगाव रस्त्यावरून जात असताना चालकाचे बसवरील नियंत्रण सुटले. त्यामुळे ही खासगी लक्झरी बस पलटी झाली अन् थेट रस्त्यावरच आडवी झाली. बसमध्ये अंदाजे २० ते २५ प्रवासी प्रवास करत असल्याची माहिती समोर आली आहे.
या घटनेची माहिती कळताच स्थानिक नागरिक आणि प्रशासनाने तातडीने घटनास्थळी धाव घेतली. त्यांनी तत्काळ मदतकार्य करून प्रवाशांना बस मधून बाहेर काढले. लक्झरी बस रस्त्याच्या मधोमध आडवी झाल्यामुळे येवला-नांदगाव महामार्गावर वाहतूक दोन्ही बाजूंनी बंद झाली होती.
काही काळ वाहतूक पूर्णपणे ठप्प झाल्याने रस्त्यावर दोन्ही बाजूने वाहनांच्या लांबच लांब रांगा लागल्या. वाहतूक पूर्ववत करण्यासाठी पोलिस प्रशासनाने या मार्गावरील वाहतूक पर्याय रस्त्याने सुरू करण्यात आली.
