दातली : सिन्नर तालुक्यातील मुसळगाव येथील दोघे ग्रामपंचायत कर्मचारी करवसुलीचे काम करत असताना नायलॉन मांजाने गंभीर जखमी झाल्याची घटना घडली. विकी पोपट जाधव व शिवशंकर खामकर अशी जखमी कर्मचाऱ्यांची नावे असून, दोघांना तातडीने उपचारासाठी रुग्णालयात दाखल करण्यात आले.
गुरेवाडी फाटा शिवारात ग्रामपंचायतीचे करवसुलीचे काम सुरू असताना लोंबकळत असलेल्या नायलॉन मांजाने कर्मचाऱ्यांच्य भुवईजवळ व हाताला खोल जखमा केल्या. अपघातानंतर परिसरात एकच गोंधळ उडाला. पाहणाऱ्यांनी तातडीने मदत करून जखमींना उपचारांसाठी हलवले.
यापूर्वी सिन्नर शहरात दोन-तीन दिवसांपूर्वी अशाच प्रकारची घटना घडली होती. त्या घटनेनंतर सिन्नर पोलिस व नगर परिषद प्रशासनाने संयुक्त मोहीम राबवत सुमारे दहा लाखांचा नायलॉन मांजा जप्त केला होता. जप्ती मोहिमेमुळे काही काळ मांजाच्या वापरात अंशतः घट झाली असली तरी, पुन्हा अशा घटना घडू लागल्याने प्रशासनाची कारवाई पुरेशी ठरत नसल्याचे स्पष्ट होत आहे.
संबंधितांवर कडक कारवाईची मागणी
स्थानिक नागरिकांनी या प्रकारावर संताप व्यक्त करत नायलॉन मांजा विक्री व वापरावर पूर्ण बंदीची काटेकोर अंमलबजावणी करण्याची मागणी केली आहे. तर सुरक्षा दृष्टीने संबंधित विभागांनी अधिक कडक कारवाई करण्याची गरज असल्याचे सांगितले जात आहे.
