देवळा : पुढारी वृत्तसेवा
चिंचवे शिवारात मुंबई-आग्रा महामार्गावर शनिवारी सकाळी भरधाव कारने दुचाकीला धडक दिली. यात दुचाकीवरील आजोबा व नातू जखमी झाले चिंचवे शिवारातील जिओ पंपाजवळील रस्ता दुभाजक परिसरात हा अपघात झाला. मालेगावकडून नाशिकच्या दिशेने जाणारी कार (एमएच १९, सीयू ४५२६) हिने दुचाकी (एमएच ४१, एव्ही ४२०७) ला धडक दिल्याचे घटनास्थळी उपस्थित नागरिकांनी सांगितले.
अपघातात जखमी चिंचवे येथील रहिवासी जिभाऊ दादाजी पवार आणि त्यांचा चार वर्षांचा नातू रस्त्यावर फेकले जाऊन जखमी झाले. अपघातानंतर काही काळ परिसरात गोंधळाचे वातावरण निर्माण झाले. स्थानिक नागरिकांनी तत्काळ मदतीसाठी बजरंग रुग्णवाहिकेला संपर्क साधला व जखमींना उपचारासाठी चांदवड येथे हलविले.
अपघातानंतर देवळा पोलिसांना माहिती देण्यात आली. त्यानंतर सहायक पोलिस निरीक्षक नंदा पाटील, नितीन बाराहाते आदी घटनास्थळी दाखल झाले. पोलिसांनी परिस्थिती नियंत्रणात आणत पंचनामा करून पुढील कार्यवाही केली.
दरम्यान, कारमधील चालक व महिलेने सतत हॉर्न वाजवत होतो; मात्र दुचाकीस्वारांच्या दुर्लक्षामुळे ही घटना घडल्याचे त्यांनी सांगितले. वारंवार अपघात घडणाऱ्या या ठिकाणी तातडीने गतिरोधक बसविण्याची मागणी ग्रामस्थांनी केली आहे.
महामार्गावरील वेगाचा खेळ थांबला नाही तर पुढचा बळी कोणाचा? असा संतप्त सवालही नागरिकांनी उपस्थित केला. दरम्यान, वाहनचालकांनी वेगाची मर्यादा पाळावी, असे आवाहन देवळा पोलिसांनी केले.
