Leopard Attack | बिबट्याने केले बोकड फस्त; दहशत कायम

नाशिक (दिंडोरी) : पुढारी वृत्तसेवा

तालुक्यातील चिंचखेड परिसरात बिबट्याची दहशत कायम आहे. गुरुवारी (दि. १) मध्यरात्रीच्या सुमारास शेतकरी शशिकांत फुगट यांचे तीन बोकड व एक शेळी बिबट्याच्या भक्ष्यस्थानी पडली. घराला मोठे तार कंपाउंड असताना देखील त्यावरून उडी घेत बिबट्याने शेळ्यांवर हल्ला केला. दोन ते तीन दिवसांपूर्वीदेखील त्याच ठिकाणावरून बिबट्याने एक बोकड फस्त केले होते. या घटनांनी परिसरात तसेच शालेय विद्यार्थ्यांमध्ये भीतीचे वातावरण पसरले असून, वनविभागाने त्वरित उपाययोजना करून बिबट्याचा बंदोबस्त करावा, अशी मागणी नागरिकांकडून होत आहे. वनरक्षक ज्ञानेश्वर वाघ यांनी घटनास्थळी भेट देऊन पंचनामा केला आहे.