नाशिक : मुंबई-आग्रा महामार्गावर दोन दुचाकींच्या भीषण अपघातात एक ठार

पोलिसांनी दिलेल्या माहितीनुसार, वडाळीभोई येथील विजय देवराम आहेर हे मोटरसायकलने (एमएच 15, 6703) मुंबई-आग्रा महामार्गाने नाशिकच्या दिशेने चालले होते. यश पेट्रोलपंपासमोर असताना पाठीमागच्या बाजूने भरधाव वेगात येणाऱ्या होंडा कंपनीची युनिकॉर्न मोटरसायकल (एमएच 41, एम 4336) वरील अज्ञात मोटरसायकलस्वाराचे नियंत्रण सुटल्याने त्याने आहेर यांच्या दुचाकीला जोरदार धडक दिली. या भीषण अपघातात विजय आहेर यांची दुचाकी महामार्गावरील दुभाजकाला जाऊन आदळल्याने त्यांच्या डोक्यास गंभीर दुखापत झाली. त्यांना तातडीने दवाखान्यात उपचारासाठी नेले असता वैद्यकीय अधिकाऱ्यांनी तपासून त्यांना मृत घोषित केले. या अपघातानंतर अज्ञात मोटरसायकल चालकाने घटनास्थळावरून पळ काढला. या घटनेबाबत मृताचे भाऊ राजेंद्र देवराम आहेर यांनी वडनेरभैरव पोलिसात फिर्याद दिल्याने अज्ञात दुचाकी चालकाविरोधात अपघाताचा गुन्हा दाखल करण्यात आला आहे. पुढील तपास सहायक पोलिस उपनिरीक्षक शकील शेख यांच्या मार्गदर्शनाखाली पोलिस नाईक व्ही. एन. घुमरे करीत आहेत.

हेही वाचा:

• पुणेकरांची विमान भरारी; आंतरराष्ट्रीय उड्डाणांची आकडेवारी वाढली
• 'सरसेनापती हंबीरराव' पाहताच प्राजक्ताच्या आजी-आजोबांच्या चेहऱ्यावर खुललं हसू
• जलतरण तलाव बंद, सराव करायचा कुठे ? जलतरणपटूंचा सवाल