मनमाड (जि. नाशिक) : पोटाची खळगी भरण्यासाठी उत्तर प्रदेशच्या लखनऊ येथून पुण्याला जाणाऱ्या दाम्पत्याचे पाच महिन्यांचे बाळ दगावल्याची मन हेलावून टाकणारी घटना लखनऊ-पुणे एक्स्प्रेसमध्ये घडली असून मनमाडला या बाळाचा दफनविधी करण्यात आला.
कामाच्या शोधात गोविंद पासवान, सुमन पासवान हे दाम्पत्य पाच महिन्यांच्या बाळासोबत लखनऊ-पुणे एक्सप्रेसने पुण्याला जात होते. गाडीत बसताना बाळ ठणठणीत होते. मात्र गाडी मनमाडला येण्याअगोदर बाळ काहीच हालचाल करत नसल्याचे पाहून पासवान दाम्पत्याने हंबरडा फोडला. गाडी मनमाडला पोहोचल्यानंतर येथे उतरून त्यांनी वेटर, व्हेंडरच्या मदतीने जवळ असलेल्या दवाखान्यात नेले असता, बाळ दगावल्याचे डॉक्टरांनी सांगितले.
अचानक घडलेल्या या घटनेमुळे पासवान दाम्पत्यावर दुःखाचा डोंगर कोसळला. अनोळखी शहरात बाळाचा अंत्यविधी कसा करावा, असा प्रश्न या दाम्पत्याला पडला होता. घटनेची माहिती मिळताच सामाजिक कार्यकर्ते विलास कटारे मदतीला धावून आले आणि त्यांनी या बाळाचा अंत्यविधी केला. ट्रेनमध्ये वाढलेली गर्दी, कडक ऊन आणि उष्मा यामुळे बाळाचा मृत्यू झाल्याची शक्यता डॉक्टरांनी व्यक्त केली.
हेही वाचा :
