जळगाव पुढारी वृत्तसेवा : रावेर शहरातील सप्तश्रृंगी नगरातील ४६ वर्षीय विवाहितेचा राहत्या घरात खून केल्याची धक्कादायक घटना दुपारच्या सुमारास उघडकीस आली आहे. या घटनेमुळे रावेर शहरात सर्वत्र खळबळ उडाली आहे.
याबाबत माहिती अशी की, रावेर शहरातील सप्तश्रृंगी नगरात राहणारी सुनिता संजय महाजन (वय-४६) या विवाहितेचा लाकडी दांडा डोक्यात मारुन खून केल्याची धक्कादायक घटना आज (दि. ३) दुपारी दीड वाजेच्या सुमारास घडली.
मयत विवाहितेचा मुलगा हा दुपारी कामावरून जेवणासाठी घरी आला, तेव्हा घराला कुलूप होते. कूलूप उघडून पाहिले असता आईचा खून झाल्याचे दिसून आले. घटनेची माहिती मिळताच शेजारच्या नागरीकांनी मोठी गर्दी केली. हा खून कोणी केला व का केला यासंदर्भात माहिती उपलब्ध झालेली नाही. खून झाल्याची माहिती रावेर पोलिसांना मिळाली, त्यानुसार पोलिस निरिक्षक कैलास नागरे, पोलिस उपनिरिक्षक विशाल सोनवणे, सचिन नवले, विजू जवरे आदी घटनास्थळी पोहचले.
