Shani Peth Bribery Investigation
जळगाव : जळगाव पोलीस दलातील लाचखोरी प्रकरणावर कठोर कारवाई करत पोलीस अधीक्षक डॉ. महेश्वर रेड्डी यांनी शनिपेठ पोलीस ठाण्यातील पोलीस नाईक विनोद पितांबर अहिरे यांना सेवेतून थेट बडतर्फ केले आहे. तसेच या प्रकरणात निष्काळजीपणा आढळल्याने पोलीस निरीक्षक कावेरी कमलाकर यांची नियंत्रण कक्षात बदली करण्यात आली आहे.
मिळालेल्या माहितीनुसार, एका तक्रारीवर कारवाई न करण्यासाठी पोलीस नाईक अहिरे यांनी एक लाख रुपयांची लाच मागितली होती. लाचलुचपत प्रतिबंधक विभागाने सापळा रचून शनिपेठ पोलीस ठाण्याच्या आवारातच त्यांना लाच स्वीकारताना रंगेहात पकडले. या घटनेमुळे पोलीस दलाची प्रतिमा मलीन झाल्याची भावना व्यक्त होत होती.
तपासादरम्यान अहिरे यांच्याविरुद्ध यापूर्वीही अनेक तक्रारी असल्याचे समोर आले. त्यामुळे केवळ निलंबन न करता थेट बडतर्फीची कठोर कारवाई करण्यात आली.
दरम्यान, या प्रकरणात वरिष्ठ म्हणून योग्य देखरेख न ठेवल्याचा ठपका ठेवत पोलीस निरीक्षक कावेरी कमलाकर यांचीही तातडीने नियंत्रण कक्षात बदली करण्यात आली आहे. तक्रार चौकशीची जबाबदारी कनिष्ठ कर्मचाऱ्याकडे सोपवून त्यावर नियंत्रण न ठेवणे हा गंभीर निष्काळजीपणा असल्याचे प्रशासनाने नमूद केले आहे.
या कारवाईमुळे जळगाव पोलीस दलात मोठी खळबळ उडाली असून, लाचखोरी करणाऱ्या कर्मचाऱ्यांवर भविष्यातही कठोर कारवाई सुरू राहील, असा इशारा पोलीस अधीक्षक डॉ. महेश्वर रेड्डी यांनी दिला आहे.
