जळगाव : मसाज सेंटरच्या नावाखाली व्यावसायिक लैंगिक सेवा सुरू असल्याची माहिती मिळाल्यानंतर जिल्हा पेठ पोलिसांनी छापा टाकून सहा महिलांची सुटका केली. या प्रकरणी अनैतिक वाहतूक (प्रतिबंध) अधिनियम, १९५६( पिटा ऍक्ट)अंतर्गत गुन्हा क्रमांक २७६/२०२६ दाखल करण्यात आला आहे.
पोलिसांच्या कारवाईत सुटका करण्यात आलेल्या सहा महिला मसाज थेरपिस्ट म्हणून संबंधित ठिकाणी कार्यरत असल्याचे प्राथमिक तपासात समोर आले आहे. त्यापैकी एक महिला दार्जिलिंग (पश्चिम बंगाल), दोन महिला मणिपूर, दोन महिला पूर्व सिक्कीम आणि एक महिला नेपाळमधील बांके येथील असल्याची माहिती आहे. त्यांचे वय २६ ते ३७ वर्षांदरम्यान आहे.
या प्रकरणात नीरजसिंग पंड्या, रा. मुखर्जी नगर, रतलाम (मध्य प्रदेश), याला स्पाचा मालक व परवानाधारक म्हणून आरोपी करण्यात आले आहे. स्पा आस्थापनाच्या आडून बेकायदेशीर व्यावसायिक लैंगिक व्यवहार चालविणे, त्याचे व्यवस्थापन करणे तसेच त्यासाठी सुविधा उपलब्ध करून देण्यात त्याची भूमिका असल्याचा पोलिसांचा आरोप आहे. तर राजेंद्र पुंडलिकराव चव्हाण, रा. यशवंत कॉलनी, रिंग रोड, जळगाव, याचाही आरोपींमध्ये समावेश आहे. संबंधित जागा त्याच्या मालकीची असून ती जागा बेकायदेशीर कारवायांसाठी वापरण्यात आल्याचा आरोप आहे.
दरम्यान, सुटका करण्यात आलेल्या महिलांपैकी नेपाळच्या बांके येथील एका महिलेच्या पासपोर्ट, व्हिसा तसेच भारतात प्रवेश व सीमापार प्रवासाच्या पार्श्वभूमीची पडताळणी सुरू असल्याची माहिती आहे. या प्रकरणामध्ये आणखी कोणाचा सहभाग आहे का, तसेच स्पा व्यवसायाच्या नावाखाली अशा प्रकारचे गैरप्रकार किती काळापासून सुरू होते, याचा तपास पोलिसांकडून केला जात आहे.
पोलिसांच्या या कारवाईमुळे शहरातील स्पा व मसाज सेंटरच्या नावाखाली सुरू असलेल्या व्यवसायांवर पुन्हा एकदा प्रश्नचिन्ह निर्माण झाले आहे. संबंधित आस्थापनांकडे आवश्यक परवाने आहेत का आणि प्रत्यक्षात ते कोणत्या स्वरूपाचा व्यवसाय करीत आहेत, याची तपासणी करण्याची गरज व्यक्त होत आहे
