जळगाव : जमिनीच्या क्षुल्लक वादातून पोटच्या सख्या पुतण्यानेच आपल्या काकाचा लाकडी काठीने डोक्यात गंभीर वार करून जागीच खून केल्याची धक्कादायक घटना रावेर तालुक्यातील गारखेडा येथे घडली आहे. खून केल्यानंतर हा केवळ अपघात भासावा, यासाठी नराधम पुतण्याने मृतदेह फरफटत नेऊन नाल्याच्या काठावर फेकून दिला होता. मात्र, रावेर पोलिसांनी आपल्या तपासाची चक्रे वेगाने फिरवत या बनावट अपघाताचा बुरखा टरकावला असून संशयित आरोपी पुतण्याला बेड्या ठोकल्या आहेत.
अपघाताचा बनाव... अन् पोलिसांचा संशय
मिळालेल्या माहितीनुसार, रावेर पोलीस ठाण्यांतर्गत येणाऱ्या पाल ओ पी तील गारखेडा गावात रामा थावरु बारेला (वय ४६, रा. गारखेडा) यांचा मृतदेह संशयास्पद स्थितीत आढळून आला होता. गारबर्डीच्या पोलीस पाटलांनी २१ जुलैच्या रात्री ११ वाजेच्या सुमारास याबाबत रावेर पोलीस ठाण्याला खबर दिली. बातमी समजताच पोलिसांनी तातडीने घटनास्थळी धाव घेतली. मृतदेहाची पाहणी केली असता रामा बारेला यांच्या डोक्याच्या उजव्या बाजूस गंभीर जखम दिसून आली. प्रथमदर्शनी हा अपघात वाटत असला तरी पोलिसांच्या चाणाक्ष नजरेने हा घातपात असल्याचे हेरले आणि तपासाची चक्रे फिरवली.
जमिनीचा वाद आणि ५-६ दिवसांचा राग...
पोलिसांनी गोपनीय बातमीदार आणि तांत्रिक तपासाच्या आधारे कसून चौकशी सुरू केली असता कौटुंबिक वादाची किनार समोर आली. मयत रामा बारेला आणि त्यांचा सख्खा पुतण्या अनिल जखा बारेला (वय २९, रा. गारखेडा) यांच्यात गेल्या ५ ते ६ दिवसांपासून जमिनीच्या कारणावरून रोज तीव्र वाद अन् शिवीगाळ सुरू होती. याच रागाच्या भरात मंगळवारी २१ जुलै रोजी सायंकाळी ६:३० वाजेच्या सुमारास आरोपी अनिल बारेला याने घराजवळ येऊन काका रामा यांच्याशी पुन्हा वाद घातला. रागाच्या भरात त्याने हातात असलेल्या लाकडी काठीने काकाच्या डोक्यात जोरदार प्रहार केला. हा वार इतका भीषण होता की, रामा थावरु बारेला यांचा जागीच तडफडून मृत्यू झाला.
पुरावा नष्ट करण्यासाठी मृतदेह नाल्यात फेकला!
काकाचा जागीच गेम बजावल्यानंतर आरोपी अनिल घाबरला नाही, तर त्याने पोलिसांची दिशाभूल करण्यासाठी डोके लावले. मारल्या गेलेल्या काकाचा मृतदेह २० ते २५ मीटर अंतरावर फरफटत नेऊन पायवाटेजवळील नाल्याच्या किनारी फेकून दिला, जेणेकरून रामा यांचा तोल जाऊन नाल्यात पडल्याने अपघात झाला असावा, असाच सर्वांचा समज व्हावा.
अखेर पोलिसांपुढे गुन्हा कबूल
रावेर पोलिसांनी आरोपी अनिल जखा बारेला याला ताब्यात घेऊन खाकी दाखवताच त्याचा बोलवता धनी जागा झाला. पोलिसांच्या कडक चौकशीत त्याने जमिनीच्या वादातूनच काकाचा खून करून मृतदेह नाल्यात फेकून दिल्याची कबुली दिली. या प्रकरणी रावेर पोलीस ठाण्यात गुन्हा रजिस्टर नंबर ३५८/२०२६ अन्वये खुनाचा गुन्हा दाखल करण्यात आला आहे. रावेर पोलिसांनी आरोपी अनिल बारेला याला २२ जुलै २०२६ रोजी रात्री उशिरा अटक केली आहे. या खळबळजनक घटनेमुळे रावेर तालुका अन् परिसरात तीव्र संताप व्यक्त केला जात आहे.
