जळगाव : पुढारी वृत्तसेवा : राईट टू एज्युकेशन अंतर्गत शाळेत प्रवेश देण्यात आलेल्या मुलाची अनुदानाची रक्कम अनुदान मंजूर होण्यासाठीचा अनुकूल अहवाल तयार करून जिल्हा परिषदेला पाठवून देण्याच्या मोबदल्यात दोन हजार रुपयांची लाच घेताना धरणगाव पंचायत समितीच्या कार्यलयात शिक्षणाधिकाऱ्यांसह शिक्षण तज्ञ यांना लाचलुचपत प्रतिबंधक विभागाने रंगेहाथ पकडल्याने एकच खळबळ उडाली आहे.
तक्रारदार यांच्या मालकीची पाळधी खु. येथे शाळा आहे. सदर शाळेत १ ली ते ७ वी पर्यंत वर्ग असून सन २०१६ पासून आजपावेतो शाळा ही स्वयं अर्थ सहाय्यता या तत्वावर चालवित आहेत. शासनाच्या राईट टू एज्युकेशन कायद्यानुसार (Right to Education) 25 टक्के विद्यार्थी शाळेत भरावयाचे असतात. त्यासाठी शासन प्रत्येक विद्यार्थामागे 8 हजार रुपयांचे वार्षिक अनुदान मंजुर करत असते. पाळधी ख़ु. शाळेतील सन २०२०-२१ या शैक्षणिक वर्षात राईट टू एज्युकेशन या योजने अंतर्गत शाळेत १७ विद्यार्थ्यांनी प्रवेश केला असून 8 हजार रुपये प्रमाणे 17 विद्यार्थ्यांचे 1 लाख 36 हजार रुपयांचे प्रतिपूर्ती अनुदानाची रक्कम झालेली होती.
सदर अनुदान मंजूर होण्यासाठीचा अनुकूल अहवाल तयार करून जिल्हा परिषदेला पाठवून देण्याच्या मोबदल्यात आरोपी अशोक दामु बिऱ्हाडे, वय-५७ गट शिक्षणाधिकारी, पंचायत समिती कार्यालय, धरणगाव. यांनी 30 डिसेंबर 2021 रोजी पंचासमक्ष 2 हजार रुपये लाचेची मागणी केली व आरोपी तुळशिराम भगवान सैंदाणे, वय-३४ , यात सामाविष्ट असलेले शिक्षण तज्ज्ञ, कंत्राटी, पंचायत समिती, गट साधन केंद्र, धरणगाव. यांनी सदर लाचेची रक्कम अशोक दामु बिऱ्हाडे, यांच्या सांगण्यावरुन स्वतः कार्यालयात स्वीकारताना डीवायएसपी शशिकांत एस. पाटील, पोलीस निरीक्षक संजोग बच्छाव, पोलीस निरीक्षक.एन.एन.जाधव, स.फौ.दिनेशसिंग पाटील, स.फौ.सुरेश पाटील, पो.हे.कॉ.अशोक अहीरे, पो.हे.कॉ.सुनिल पाटील, पो.हे.कॉ.रविंद्र घुगे, पो.हे.कॉ. शैला धनगर, पो.ना.मनोज जोशी, पो.ना.सुनिल शिरसाठ, पो.ना.जनार्धन चौधरी, पो.कॉ.प्रविण पाटील, पो.कॉ.महेश सोमवंशी, पो.कॉ.नासिर देशमुख, पो.कॉ.ईश्वर धनगर, पो.कॉ.प्रदिप पोळ यांनी रंगेहाथ अटक केली.
