नगर: गुरुपौर्णिमेचे औचित्य साधत तीन लाख भाविकांनी साई समाधीचे दर्शन घेतले. या तीन दिवसांच्या उत्सव काळात ७ कोटी ८१ लाख १३ हजार ३७७ रुपयांची देणगी प्राप्त झाल्याची माहिती संस्थानचे मुख्य कार्यकारी अधिकारी गोरक्षनाथ गाडीलकर यांनी दिली.
२८ ते ३० जुलैदरम्यान श्री गुरुपौर्णिमा उत्सव कालावधीत सुमारे ३ लाखांहून अधिक साईभक्तांनी साई समाधी दर्शनाचा लाभ घेतला. श्री साईप्रसादालयात तीन दिवसांत सुमारे १ लाख ९४ हजार २८५ साईभक्तांनी प्रसाद भोजनाचा, तर ३९ हजार ६११ अन्नप्रसाद पाकिटांचा लाभ घेतला.
दर्शन रांगेत १ लाख ६५ हजार २०० साईभक्तांना मोफत बुंदी प्रसाद पाकिटांचे वाटप करण्यात आले. उत्सव काळात ७१ लाख ७ हजार ३६० रुपये सशुल्क प्रसादरुपी लाडू पाकिटांच्या माध्यमातून प्राप्त झाले.
उत्सव काळात साईभक्तांनी संस्थानच्या साईप्रसाद निवासस्थान, साईबाबा भक्त निवासस्थान, द्वारावती निवासस्थान, साईआश्रम भक्तनिवास व साई धर्मशाळा यासह अतिरिक्त निवास व्यवस्थेकरिता उभारण्यात आलेल्या मंडपात निवास व्यवस्थेचा लाभ घेतला. तसेच साई धर्मशाळा येथे विविध भागातून आलेल्या ३९ पालख्यांमधील पदयात्री साईभक्तांनी निवास व्यवस्थेचा लाभ घेतला, असे मुख्य कार्यकारी अधिकारी गोरक्ष गाडीलकर यांनी सांगितले.
अशी मिळाली देणगी
रोकड : २ कोटी ४ लाख ३५ हजार ५५७ (दक्षिणा पेटी)
देणगी : काउंटरवर १ कोटी २५ लाख ४७ हजार ९३५
पीआरओ देणगी : ८७ लाख १४ हजार
डेबिट क्रेडिट कार्ड, ऑनलाईन, चेक, डी.डी., मनिऑर्डर : २ कोटी ७ लाख ८४ हजार ७०१ रुपये
परकीय चलन : ५ लाख ६५ हजार ९९१ रुपये
सोने ११२५.५७० ग्रॅम (मूल्य १ कोटी ४६ लाख)
चांदी २३७६.५०० ग्रॅम (मूल्य ३ लाख ९० हजार)
