शेवगाव: शेवगाव तालुक्यात एका १७ वर्षीय अल्पवयीन मुलीचे भररस्त्यातून अपहरण करून तिच्यावर अत्याचार केल्याची धक्कादायक घटना समोर आली आहे. या घटनेमुळे नागरिकांमधून संताप व्यक्त केला जात आहे. या प्रकरणी पोलिसांनी भारतीय न्याय संहिता आणि पोक्सो कायद्यानुसार गंभीर कलमांखाली गुन्हा दाखल केला आहे.
याबाबत पोलिस सूत्राकडून समजलेली माहिती अशी ः गेल्या ९ ऑक्टोबर रोजी सायंकाळी पीडित मुलगी प्रकृती अस्वस्थ असल्याने वैद्यकीय उपचारासाठी पायी जात होती. यावेळी स्वामी समर्थ मंगल कार्यालयासमोर काळ्या रंगाच्या स्कॉर्पिओतून आलेल्या काही जणांनी तिचा रस्ता अडवून तिला जबरदस्तीने फूस लावून वाहनांमध्ये पळून नेले.
बाबत शेवगाव पोलिस ठाण्यात गुन्हा दाखल करण्यात आला होता. त्यानंतर १५ ऑक्टोबर रोजी पीडित मुलगी आढळून आल्याने तिच्या जबाबवरून अक्षय बोरुडे (रा. तिसगाव), हनुमंत गोल्हार यांच्या विरुद्ध पळवून नेऊन तिच्यावर अत्याचार केल्या प्रकरणी पोक्सो कायद्याच्या कलम ३, ४ आणि ६ अंतर्गत वाढीव कलमे लावण्यात आली आहेत
या संपूर्ण प्रकरणाचा निःष्पक्ष आणि पारदर्शक तपास करण्यात यावा, वाढीव कलमांच्या अहवालातून तक्रारी मधून वगळण्यात आलेल्या आरोपीची सखोल चौकशी करून पुराव्यांनुसार कारवाई करावी, तसेच पीडित कुटुंबीयांना तातडीने पोलिस संरक्षण द्यावे, अशी मागणी फिर्यादीने जिल्हा पोलिस प्रमुखांकडे निवेदनाद्वारे केली आहे. या प्रकरणाचा पुढील तपास शेवगाव पोलिस ठाण्याचे पोलिस उपनिरीक्षक विनोद खांडबहाले करीत आहेत. अल्पवयीन मुलीवरील अत्याचाराच्या या गंभीर प्रकरणातील सर्व संबंधितांची निःष्पक्ष चौकशी करून दोषींवर कठोर कारवाई करावी, अशी मागणी कुटुंबांनी केली आहे.
एका आरोपीचे नाव वगळल्याचा आरोप
या प्रकरणात मूळ तक्रार आणि जबाबामध्ये आणखी एकाचे नाव नमूद असतानाही वाढीव कलमांच्या अहवालातून त्याचे नाव वगळण्यात आल्याचा आरोप फिर्यादीकडून करण्यात आला आहे. त्यामुळे तपासाच्या पारदर्शकतेबाबत प्रश्न उपस्थित होत असून पोलिसांवर राजकीय दबाव आहे का, अशी शंका फिर्यादीने व्यक्त केली आहे.