पाथर्डी: शहरात शनिवारी (दि. 21) रात्री चोरट्यांनी अक्षरशः धुमाकूळ घालत चार ठिकाणी घरफोड्या केल्या. एडके कॉलनी आणि कसबा परिसरात झालेल्या या चोरीच्या मालिकेमुळे नागरिकांमध्ये खळबळ उडाली आहे.
एडके कॉलनी परिसरात शिक्षक युवराज सीताराम वायळ यांच्या घरासह आणखी दोन ते तीन ठिकाणी चोरट्यांनी घरफोड्या केल्या. वायळ कुटुंबासह गावी गेल्याचा फायदा घेत चोरट्यांनी घराचे कुलूप तोडून आत प्रवेश केला. घरातील कपाटांची उचकापाचक करून सोन्या-चांदीचे दागिने व रोकड चोरून नेल्याचे फिर्यादीत म्हटले आहे.
मनी मंगळसूत्र (20 ग्रॅम), मिनी गंठन (5 ग्रॅम), चांदीची चेन आणि 8 हजार रोकड असा मुद्देमाल शिक्षक वायळ यांच्या घरातून चोरट्यांनी लंपास केला. ही घटना 17 ते 21 मार्चदरम्यान घडल्याचे स्पष्ट झाले आहे.
शेजारी अजय सुसलादे यांनी घराचे तुटलेले कुलूप पाहून वायळ यांना माहिती दिल्यानंतर चोरीचा प्रकार उघडकीस आला. दरम्यान, शेजारी राहणाऱ्या भारती कचरू ढाणके यांच्या घरातही चोरी झाल्याचे समोर आले. कसबा परिसरातील ब्राह्मण गल्ली येथे राहणारे शाहू फरताळे यांचे घरही चोरट्यांनी फोडले.
या घटनेतील गंभीर बाब म्हणजे चोरटे सीसीटीव्ही कॅमेऱ्यात कैद झाले असून, त्यांनी तोंडाला रुमाल बांधलेले व पाठीवर बॅग लटकवलेली स्पष्टपणे दिसत आहे. एका चोरट्याने कुत्रा भुंकू नये म्हणून त्याच्यावर दगड फेकल्याचेही दृश्य कॅमेऱ्यात टिपले गेले आहे. तसेच एका चोरट्याच्या हातात शस्त्र असल्याचेही दिसून येत आहे.
