पाथर्डी: शहरातील बोरुडे मळा परिसरात शासकीय वाळूची विनापरवाना चोरी करून वाहतूक करण्याच्या तयारीत असलेल्या तरुणाला स्थानिक गुन्हे शाखेच्या पथकाने पकडले. या कारवाईत जेसीबी, डंपर आणि चार ब्रास शासकीय वाळू असा एकूण ४० लाख ४० हजारांचा मुद्देमाल जप्त करण्यात आला आहे.
या प्रकरणी उमेश विष्णू कचरे (वय २२, रा. पाडळी, ता. पाथर्डी) याच्याविरुद्ध पाथर्डी पोलिस ठाण्यात गुन्हा दाखल करण्यात आला आहे. या प्रकरणातील नारायण बोरुडे (पूर्ण नाव माहीत नाही, रा. बोरुडे मळा) फरार असल्याचे फिर्यादीत नमूद करण्यात आले आहे.
स्थानिक गुन्हे शाखेचे पोलिस कर्मचारी सतीश भवर यांनी याबाबत फिर्याद दिली आहे. त्यानुसार, रविवारी (दि. २०) स्थानिक गुन्हे शाखेचे पोलिस हेड कॉन्स्टेबल अरुण गांगुर्डे, पोलिस कॉन्स्टेबल रणजित जाधव, अमोल कोतकर हे अवैध धंद्यांची माहिती घेऊन कारवाईसाठी गस्त घालत होते. या वेळी गांगुर्डे यांना गुप्त बातमीदारामार्फत बोरुडे मळा येथे नारायण बोरुडे हा जेसीबीच्या सहाय्याने डंपरमध्ये शासकीय वाळू भरून तिची विनापरवाना वाहतूक करणार असल्याची माहिती मिळाली. त्यानंतर पोलिसांनी पंचांसह बोरुडे मळा परिसरात जाऊन पाहणी केली.
पोलिसांना बोरुडे यांच्या घरासमोर जेसीबीच्या सहाय्याने डंपरमध्ये वाळू भरली जात असल्याचे दिसून आले. या वेळी जेसीबी चालक उमेश कचरे याला ताब्यात घेऊन चौकशी केली असता, जेसीबी व डंपर हे नारायण बोरुडे यांच्या मालकीचे असल्याचे त्याने सांगितल्याचे फिर्यादीत नमूद आहे. वाहनांची तपासणी केली असता डंपरमध्ये अंदाजे चार ब्रास शासकीय वाळू आढळून आली. वाळू वाहतुकीचा कोणताही परवाना नसल्याचेही तपासणीत समोर आल्याचे पोलिसांनी नमूद केले आहे.
या कारवाईत २५ लाखांचा जेसीबी, १५ लाखांचा डंपर आणि ४० हजारांची अंदाजे चार ब्रास शासकीय वाळू असा एकूण ४० लाख ४० हजार रुपयांचा मुद्देमाल जप्त करण्यात आला. या प्रकरणी उमेश विष्णू कचरे आणि नारायण बोरुडे यांच्याविरुद्ध गुन्हा दाखल करण्यात आला आहे. पुढील तपास पाथर्डी पोलिस करत आहेत.
