नगर: दुष्‍काळी परिस्‍थितीमुळे धरणांतील पाणी ऑगस्ट २०२७ पर्यंत पिण्यासाठी राखीव ठेवण्‍याचे निर्देश शासनाने दिले आहेत. त्‍यानुसार मुळा धरणातील पाच टीएमसी पाणीसाठा राखीव ठेवण्‍यात आला आहे. यामध्‍ये दीड टीएमसी बफरस्‍टॉकचा समावेश आहे. या धरणातून अहिल्यानगर शहर, राहुरी शहर, राहुरी विद्यापीठ व सोनईसह काही गावांना २२ पाणीयोजनांव्‍दारे पाणीपुरवठा केला जात आहे.
मुळा, भंडारदरा, निळवंडे आदी धरणांच्‍या पाणलोट क्षेत्रात झालेल्या दमदार पावसामुळे भंडारदरा, निळवंडे व आढळा ही तिन्ही धरणे ओव्‍हर-फ्‍लो झाली. मुळा धरण यंदा ९५ टक्‍के भरले. मात्र, या धरणांच्‍या लाभक्षेत्रासह जिल्‍हाभरात पावसाने पाठ फिरवली. बहुतांश महसूल मंडळांमध्ये पावसाचा मोठा खंड पडला. त्‍यामुळे जिल्‍हाभरातील भूजलपातळी जवळपास तीन मीटरने खालावली आहे.
गोदावरी, प्रवरा व मुळा नदीकाठांवरील विहिरी वगळल्‍या तर उर्वरित जिल्‍हाभरातील बहुतांश विहिरींनी तळ गाठला आहे. जानेवारी -फेब्रुवारी महिन्‍यांत विहिरी कोरड्याठाक दिसण्याची भीती आहे. अशा वेळी मोठ्या प्रमाणात पाणीटंचाई निर्माण होऊन गावागावांत पाणीटंचाईचा प्रश्‍न जटील होण्याचीही भीती आहे. प्रसंगी टँकर भरण्‍यासाठीही पाण्‍याचे स्‍त्रोत मिळणे मुश्‍कील होण्याची शक्यता व्यक्त होत आहे.
त्‍यामुळे खबरदारी म्हणून शासनाने धरणांतील उपलब्‍ध पाणी प्राधान्‍याने पिण्यासाठी राखीव ठेवण्‍याचे निर्देश दिले आहेत. त्‍यानुसार मुळा धरणाचे साडेतीन टीएमसी पाणी ऑगस्ट २०२७ पर्यंत पिण्यासाठी राखीव ठेवले. याशिवाय आपत्कालीन परिस्‍थितीत वापर करता यावा यासाठी आणखी दीड टीएमसी पाण्‍याचा बफरस्टॉक करण्‍यात आल्‍याचे मुळा पाटबंधारे विभागाच्‍या कार्यकारी अभियंता सायली पाटील यांनी सांगितले.
मुळा धरणाचा पाणीसाठा ६९ टक्‍के
मुळा धरण यंदा ९५ टक्‍के भरले होते. खरीप पिके पावसाअभावी वाया जाण्‍याच्‍या भीतीमुळे जवळपास पाच टीएमसी पाणी खरीप पिकांसाठी सोडण्‍यात आले होते. शुक्रवारी (दि.१६) सकाळी ६ वाजता या धरणाचा पाणीसाठा ६९.२४ टक्‍के म्‍हणजे १८ हजार २ दशलक्ष घनफूट इतका नोंदविला गेला आहे. या धरणाचा मृत साठा साडेचार टीएमसी इतका आहे.
