पाथर्डी: रंगपंचमीच्या पूर्वसंध्येला मढी येथे कानिफनाथांच्या संजीवन समाधी दर्शनासाठी नाथभक्तांनी मोठी गर्दी केली आहे. नाथ संप्रदायाचे शक्तिपीठ असलेल्या मढी येथे शनिवारी लाखो नाथभक्त दाखल झाले असून परिसरात भक्तीमय वातावरण निर्माण झाले आहे. रंगपंचमीला पारंपरिक पद्धतीने कानिफनाथांचा समाधी सोहळा साजरा केला जातो. त्या सोहळ्याच्या पर्वणीसाठी राज्यभरातून भाविक मढीत दाखल झाले आहेत.
यात्रेनिमित्त मढीत विविध दुकाने, स्टॉल, राहट पाळणे, मनोरंजनाचे खेळ आणि अन्य आकर्षणांची रेलचेल दिसून येत आहे. मढीची गादी राजयोगी गादी म्हणून प्रसिद्ध असून प्रत्येक भक्तांच्या हाकेला पावणारी अशी नाथभक्तांची भावना आहे. यात्रेसाठी आलेले नाथभक्त शिंगी, शैली, कंथा, कमंडलू, मुद्रा, जानवे तसेच भगवे वस्त्र परिधान करून भक्तिभावाने समाधीचे दर्शन घेत आहेत.
कानिफनाथांच्या समाधीवरील पवित्र लेप तावीदामध्ये भरून घेऊन ते वर्षभर त्याची पूजा करतात. तसेच नाथभक्त देवकाठी (अस्थान्या) घेऊन यात्रेत सहभागी होतात. त्या देवकाठीवर त्रिशूल लावलेले असते आणि ती देवाच्या मंदिराच्या कळसाला स्पर्श करून अर्पण केली जाते.
या परंपरेला नाथ संप्रदायात विशेष महत्त्व आहे. यात्रेच्या पार्श्वभूमीवर देवस्थान समितीने विविध सुविधा उपलब्ध करून दिल्या आहेत. गावात ठिकठिकाणी पार्किंग व्यवस्था करण्यात आल्याने वाहनांची कोंडी टाळण्यास मदत होत आहे.
आमदार मोनिका राजळे यांच्या मार्गदर्शनाखाली देवस्थान समितीचे अध्यक्ष विठ्ठल मरकड यांच्यासह सर्व विश्वस्त मंडळ यात्रेच्या नियोजनात सक्रिय सहभागी झाले आहेत. प्रांताधिकारी प्रसाद मते, तहसीलदार उद्धव नाईक तसेच पोलिस निरीक्षक विलास पुजारी यांच्या मार्गदर्शनाखाली चोख पोलीस बंदोबस्त ठेवण्यात आला आहे.
