नगर: सावेडी गावामध्ये माजी महापौर बाबासाहेब वाकळे यांच्या माध्यमातून गेल्या सत्तावीस वर्षांपासून जगद्गुरू संत तुकाराम महाराज यांच्या बीज उत्सवानिमित्त अखंड हरिनाम सप्ताह व गाथा पारायण सोहळ्याचे आयोजन करण्यात येते. हा सोहळा दरवर्षी मोठ्या धार्मिक उत्साहात आणि भक्तिमय वातावरणात होत असून, यावर्षीही सावेडीगाव भक्तिरसात न्हाऊन निघाले.
यानिमित्ताने सावेडी गावात भव्य दिंडी सोहळ्याचे आयोजन करण्यात आले होते. दिंडी सोहळ्यात टाळ-मृदुंगाच्या गजरात संपूर्ण गाव दुमदुमून गेले होते. ज्ञानोबा माऊली तुकाराम च्या जयघोषाने वातावरण भक्तिमय झाले होते. गावातील महिला-पुरुष, युवक-युवती तसेच लहान मुले मोठ्या उत्साहाने या दिंडीमध्ये सहभागी झाले होते. दिंडी मार्गावर गावातील महिलांनी ठिकठिकाणी सडा-रांगोळी काढून दिंडीचे स्वागत केले. रंगीबेरंगी रांगोळ्यांनी सजलेले रस्ते आणि भक्तिरसात रंगलेले वारकरी हे दृश्य सर्वांचे लक्ष वेधून घेत होते. महिला डोक्यावर कलश घेऊन मिरवणुकीमध्ये सहभागी झाल्या होत्या.
दिंडी सोहळ्याच्या माध्यमातून गावामध्ये आध्यात्मिकतेचा आणि संस्कृतीचा वारसा जपण्याचे कार्य केले जाते. या मिरवणुकीत ज्येष्ठ महिला-पुरुष मोठ्या उत्साहाने सहभागी झाले होते. काही ठिकाणी महिलांनी फुगडी खेळत भक्तीमय वातावरणात आनंद व्यक्त केला. यावेळी माजी महापौर बाबासाहेब वाकळे आणि सरला वाकळे यांनीही दिंडी सोहळ्यामध्ये सहभागी होत भक्तांसोबत नाचत उत्सवाचा आनंद घेतला.
