नेवासा: सध्या आयपीएल क्रिकेटचा महासंग्राम रंगात आला असताना शहरांसोबतच ग्रामीण भागातही सट्टेबाजीचे जाळे वेगाने पसरत असल्याचे समोर आले आहे. नेवासा तालुक्यातील सोनई, शनिशिंगणापूर आणि घोडेगाव परिसरात छुप्या पद्धतीने आयपीएलवर सट्टा खेळवला जात असल्याची चर्चा जोर धरत आहे.
स्थानिकांकडून मिळालेल्या माहितीनुसार, या सट्टेबाजीमध्ये ग्रामीण भागातील अनेक तरुण आणि महाविद्यालयीन विद्यार्थी सहभागी होत असून लाखो रुपयांची उलाढाल होत आहे. अनेक जण मोठ्या प्रमाणात पैसे गमावून कर्जबाजारी झाले असून काहींवर तर गाव सोडण्याची वेळ आल्याची धक्कादायक माहिती समोर येत आहे.
विशेष म्हणजे शनिशिंगणापूर सारख्या प्रसिद्ध तीर्थक्षेत्रातही हा प्रकार सुरू असल्याचे सांगितले जात आहे. त्यामुळे धार्मिक स्थळाच्या पवित्रतेवरच प्रश्न उपस्थित होत आहेत. स्थानिक पोलिसांना या सट्टेबाजीची माहिती असल्याची चर्चा असली तरी ठोस कारवाई होत नसल्याने नागरिकांमध्ये नाराजीचे वातावरण आहे.
तेरी भी चूप, मेरी भी चूप अशा पद्धतीने हा सट्टा गुपचूप चालत असल्याने अनेक प्रकरणे उघडकीस येत नाहीत. यामुळेच सट्टेबाजांचे जाळे अधिक बळकट होत असल्याची भीती व्यक्त केली जात आहे.
या प्रकारामुळे युवकांचे भवितव्य धोक्यात येत असल्याची चिंता पालकांकडून व्यक्त केली जात आहे. सट्टेबाजीमुळे आर्थिक तसेच मानसिक ताण वाढत असून कुटुंबांवर उपासमारीची वेळ येण्याची शक्यता नाकारता येत नाही.
कठोर कारवाईची गरज
दरम्यान, या संपूर्ण प्रकरणावर पोलिस प्रशासनाने तातडीने लक्ष देऊन कठोर कारवाई करावी, अशी मागणी नागरिकांकडून होत आहे. ग्रामीण भागात वाढत्या सट्टेबाजीच्या प्रकारामुळे सामाजिक व आर्थिक परिणाम गंभीर होण्याची शक्यता असल्याने प्रशासनाने याकडे गांभीर्याने पाहणे गरजेचे असल्याचे मत जाणकारांनी व्यक्त केले आहे.
