नगर: मीरावली पहाड पायथ्याशी दरोडा घालण्याच्या तयारीत असलेल्या पुण्यातील कुख्यात आंदेकर टोळीतील कोयता गँगच्या मुसक्या पोलिसांनी आवळल्या. त्यांच्याकडून चार गावठी पिस्तूल, दहा जिवंत काडतुसांसह 2 लाख 76 हजारांचा मुद्देमाल जप्त केला. याप्रकरणी भिंगार कॅम्प पोलिस ठाण्यात गुन्हा दाखल करण्णयात आला आहे.
मुस्ताक इब्राहीम शेख (वय 22, रा. कोंढवा, आश्रमनगर, पुणे), विराट ऊर्फ विल्यम रवींद्र मेहंदळे (वय 26), समर्थ बाबासाहेब माडळकर (वय 19), समर्थ राजेंद्र दुधभाते (वय 18, तिघे रा. काकडे वस्ती, कोंढवा, पुणे), आकाश संजय पवार (रा. ब्रह्मतळे, रा. भिंगार) अशी त्यांची नावे आहेत.
स्थानिक गुन्हे शाखेचे पोलिस निरीक्षक किरणकुमार कबाडी यांना 26 मे रोजी अहिल्यानगरच्या मिलिट्री इंटेलिजेन्सकडून (साउथ कमांड) याबाबत माहिती मिळाली होती. त्यांनी तातडीने पोलिस पथकाला रवाना केले. मीरावली पथकाने पहाडाच्या पायथ्याजवळ पाच संशयित तरुणांना पाठलाग करून ताब्यात घेतले. त्यातील आकाश पवार दुचाकीवर पळून गेला होता. नंतर शोध घेऊन अटक करण्यात आली.
सर्व आरोपींकडून तीन गावठी पिस्तूल, 10 जिवंत काडतुसे, कोयता, चाकू, मोबाईल असा मुद्देमाल जप्त केला. आधीच्या चार आरोपींना न्यायालयाने तीन दिवसांची पोलिस कोठडी सुनावली. उपनिरीक्षक अनंत सालगुडे, राजेंद्र वाघ, पोलिस अंमलदार गणेश धोत्रे, सुनील पवार, विष्णु भागवत, शाहीद शेख, प्रकाश मांडगे, बाळासाहेब गुंजाळ, प्रशांत राठोड यांच्या पथकाने ही कारवाई केली.
पुण्यात गंभीर गुन्हे दाखल
पोलिसांनी पकडलेल्या टोळीतील आरोपी पुण्यातील कुख्यात गुन्हेगार आहेेत. आरोपी समर्थ मांडळकर, समर्थ दुधभाते यांच्याविरोधात कोंढवा, पुणे शहर पोलिस ठाण्यात गंभीर स्वरूपाचे गुन्हे दाखल आहेत. आरोपी आकाश पवारविरुद्ध भिंगार कॅम्प पोलिस ठाण्यात दोन गंभीर गुन्हे दाखल आहेत.
