नगर: भाजी मार्केटच्या मागील बाजूस असलेल्या प्रेशर पंपाच्या दुकानासमोर टेम्पो मागे घेण्यावरून झालेल्या वादातून एका तरुणावर लोखंडी गजाने जीवघेणा हल्ला करण्यात आला. तसेच भांडण सोडवण्यासाठी आलेल्या त्याच्या आईला मारहाण करून गळ्यातील दोन तोळ्यांची सोन्याची साखळी लांबविली.
ही घटना २४ सप्टेंबर रोजी सायंकाळी घडली. याप्रकरणी कोतवाली पोलिस ठाण्यात गुन्हा दाखल झाला आहे. अमोल सानप (रा. सारसनगर, अहिल्यानगर) व त्याच्या एका अनोळखी साथीदाराविरुद्ध गुन्हा दाखल करण्यात आला.
याबाबत तुषार पांडुरंग भागानगरे (वय ३२, रा. पंचपीर चावडी, माळीवाडा) यांनी पोलिसांत फिर्याद दिली. फिर्यादी २४ सप्टेंबर रोजी सायंकाळी भाजी मार्केट यार्ड परिसरात होते. त्यावेळी आरोपी अमोल सानप हा टेम्पो रस्त्यावरून मागे (रिव्हर्स) घेत होता. "टेम्पो मागे घेताना व्यवस्थित पाहून घ्या," असे तुषार यांनी सांगितल्याचा राग धरून आरोपींनी त्यांना शिवीगाळ करीत लाथाबुक्क्यांनी मारहाण सुरू केली.
त्यानंतर आरोपी अमोल सानप याने टेम्पोमधून लोखंडी गज काढून तुषार यांच्या हातावर, छातीवर व पाठीवर मारून गंभीर जखमी केले. भांडण सोडवण्यासाठी तुषार यांची आई मध्यस्थी करायला आली असता, आरोपींनी त्यांनाही मारहाण करून दोन तोळे वजनाची सोन्याची साखळी हिसकावून घेतली, असे फिर्यादीत म्हटले आहे. पोलिस उपनिरीक्षक दीपक मेढे गुन्ह्याचा तपास करीत आहेत.
