नगर तालुका: दुष्काळी परिस्थिती, शेतीतून अपेक्षित उत्पन्न नाही, डोक्यावर वाढत गेलेला कर्जाचा बोजा आणि त्यातच आजारपणाच्या उपचारांचा खर्च अशा आर्थिक विवंचनेतून खडकी (ता. अहिल्यानगर) येथील दीपाली प्रकाश रोकडे (वय ३७) या शेतकरी महिलेने घराजवळील विहिरीत उडी घेऊन आत्महत्या केली. ही दुर्दैवी घटना बुधवारी रात्री(दि.२३) घडली.
दीपाली रोकडे यांच्या कुटुंबाकडे अवघी साडेतीन ते चार एकर शेती आहे. शेती आणि मोलमजुरीच्या उत्पन्नावर कुटुंबाचा उदरनिर्वाह सुरू होता. मात्र, गेल्या काही काळात कुटुंबावरील आर्थिक संकट वाढत गेले.
दोन वर्षांपूर्वी घर बांधण्यासाठी घेतलेले हातउसने स्वरूपातील सुमारे चार ते पाच लाख रुपयांचे कर्ज, त्यानंतर अलाहाबाद बँकेचे सुमारे एक लाख रुपये, सेवा सोसायटीचे सुमारे ४० हजार रुपये तसेच खेळते भांडवल कर्जाचे ३५ हजार रुपये, असा कर्जाचा मोठा बोजा कुटुंबावर असल्याचे नातेवाईकांनी सांगितले.
त्यातच काही दिवसांपूर्वी दीपाली यांच्यावर आजारपणामुळे उपचार करण्यात आले होते. उपचारासाठी झालेल्या खर्चामुळे कुटुंबाच्या आर्थिक अडचणीत आणखी भर पडली. यंदाच्या खरीप हंगामात पेरणी करूनही पुरेसा पाऊस न झाल्याने शेतीतून अपेक्षित उत्पन्न मिळाले नाही.
पुढील काळातही पावसाची परिस्थिती समाधानकारक नसल्याने शेतीतून उत्पन्नाची शक्यता कमी झाली होती. कर्जाचा वाढता बोजा व आजारपणाचा उपचार याला कंटाळून दिपाली रोकडे यांनी आत्महत्या केल्याची माहिती नातेवाईकांनी दिली.
दीपाली रोकडे यांच्या पश्चात पती, एक मुलगा, एक मुलगी आणि सासू असा परिवार आहे. या घटनेने कुटुंबावर दुःखाचा डोंगर कोसळला असून, दोन मुलांच्या डोक्यावरून आईचे छत्र हरपले आहे.
शेतीचे नुकसान, वाढता कर्जबोजा आणि वैद्यकीय खर्च यामुळे अडचणीत आलेल्या कुटुंबांला शासनाकडून तातडीने मदत मिळावी अशी भावना ग्रामस्थांनी व्यक्त केली.
दुष्काळग्रस्त शेतकऱ्यांना शासनाने तातडीने पहिल्या टप्प्यात मदत द्यावी. पीक नुकसानीचे पंचनामे तातडीने पूर्ण करून नुकसानभरपाई द्यावी. तसेच कर्जाबाबत दिलासा आणि आर्थिक अडचणीत असलेल्या शेतकरी कुटुंबांना तातडीची आर्थिक मदत मिळावी. शासनाची मदत केवळ कागदावर न राहता ती प्रत्यक्ष शेतकऱ्यांच्या बांधावर पोहोचली पाहिजे.
- संदेश कार्ले, माजी जिल्हा परिषद सदस्य
