जळगाव : जिल्ह्यातील चोपडा शहरात मुख्य बाजारपेठेतील राहुल एम्पोरिअम या तीन मजली कापड दुकानास गुरुवारी रात्री तीन वाजेच्या दरम्यान आग लागली. आगीत गौरव राखेचा (वय २७) या तरुणाचा आगीत होरपळून दुर्दैवी मृत्यू झाला आहे.
चोपडा येथील मेनरोड वरील इमारतीत तळ मजल्यावर कापड दुकान, दुसऱ्या व तिसऱ्या मजल्यावर रहिवास असणाऱ्या राहुल एम्पोरिएम या तीन मजली इमारतीस मध्यरात्री अचानक आग लागली. आग इतकी भयंकर होती की, आगीने काही क्षणांत रौद्ररूप धारण केले. आगीच्या ज्वाला दुसऱ्या व तिसऱ्या मजल्यावरून खिडकीच्या बाहेर येत होत्या. आगीची माहिती मिळताच पोलीस, नगर पालिका प्रशासन यांनी बचावकार्य सुरू केले. आग विझवण्यासाठी चोपडा, अमळनेर, धरणगाव, यावल, शिरपूर, जळगांव येथील अग्निशमन दलाची वाहने दाखल झाली होती.
बाथरूममध्ये जळालेल्या स्थितीत मृतदेह आढळला
नगर पालिकेचे फायर विभागाचे कर्मचारी व शहरातील तरुण यांनी आग विझवण्यासाठी अथक परिश्रम केले. यात घरात अडकलेल्या पाच वर्षीय चिमुकलीसह सहा जणांना बाहेर काढण्यात यश आले. मात्र गौरव हा जीव वाचवण्यासाठी इतरत्र जागा शोधण्याच्या नादात बेडरूम मधून बाथरूम मध्ये थांबला. तिथेच त्याचा घात झाला. सकाळी सहा वाजता बाथरूममध्ये जळालेल्या स्थितीत त्याचा मृतदेह आढळला.
लाखो रुपयांचे नुकसान….
आग इतकी तीव्र होती की घरातील पीओपी, घरातील, जिन्यातील फरशा, किचन ओटा, भांडी जळून कोळसा झाले आहेत. सोफ्याच्या ड्रावरमध्ये ठेवलेली नोटांची बंडल जळाली. तीनच्या सुमारास लागलेल्या आगीवर पहाटे सहा वाजता नियंत्रण मिळवण्यात आले. मात्र गौरव याला वाचवण्यात अपयश आल्याने हळहळ व्यक्त करण्यात येत आहे, आगीत लाखो रुपयांचे नुकसान झाले आहे.
हेही वाचा :
