नाशिक पंचवटी : पुढारी वृत्तसेवा
चारित्र्याचा संशय घेत व कौटुंबिक वादातून पतीने पत्नीच्या गळ्यावर धारदार शस्त्राने वार करीत गळा चिरला. त्यानंतर पतीने तिसर्या मजल्यावरून उडी मारून आत्महत्या केल्याची घटना मखमलाबाद शिवारातील रामकृष्णनगरला (शांतीनगर) मंगळवारी (दि.7) दुपारी 3.30 वाजता घडली आहे.
या घटनेत संध्या राजू ठाकूर (45) गंभीर जखमी झाली आहे. तर पती राजू रतनसिंग ठाकूर (50) याचा मृत्यू झाला आहे. याबाबत म्हसरूळ पोलिसांनी दिलेल्या माहितीनुसार, मखमलाबाद शिवारातील शांतीनगर रामकृष्ण नगर असलेल्या लक्ष्मी रेसिडेन्सी सदनिकेत ठाकूर दाम्पत्य दोन मुलांसमवेत राहतात. मंगळवारी दुपारी घरी कोणी नसताना दोघा पती-पत्नीत वाद झाले. त्यातून पती राजू याने पत्नी संध्या हीस शिवीगाळ करीत गळ्यावर शस्त्राने वार करून गळा चिरला. संध्या या रक्ताच्या थारोळ्यात पडल्यानंतर पती राजू याने घराच्या तिसर्या मजल्यावर असलेल्या गॅलरीतून उडी मारली. त्यात डोक्याला गंभीर मार लागल्याने त्याचा घटनास्थळी मृत्यू झाला. पत्नी संध्या गंभीर जखमी झाल्याने तिला उपचारासाठी खासगी रुग्णालयात दाखल करण्यात आले आहे. या प्रकरणी म्हसरूळ पोलिस तपास करीत आहेत.
