नाशिक (घोटी) : पुढारी वृत्तसेवा
पतीने रागाच्या भरात पत्नी, सासू व आपल्या अल्पवयीन मुलीवर विळा व कात्रीने केलेल्या हल्ल्यात सासू जागीच ठार, तर पत्नी व मुलगी गंभीर जखमी झाल्याची धक्कादायक घटना त्र्यंबकेश्वर तालुक्यातील झारवड येथे रविवारी सकाळी घडली. पती मद्यपी असल्याने पत्नी माहेरी येण्यास टाळाटाळ करीत होती. त्यावरून पती-पत्नीत झालेले भांडण सासू व मुलगी सोडवत होती. त्या दरम्यान पतीने हा हल्ला केला.
त्र्यंबकेश्वर व इगतपुरी तालुक्याच्या हद्दीवर असलेल्या झारवड-जोशीवाडी येथे ही घटना घडली. पती किसन महादू पारधी (42, रा. कळमुस्ते-जांभुळवाडी, ता. त्र्यंबकेश्वर) याला दारूचे व्यसन असल्याने पत्नी इंदुबाई किसन पारधी (36) काही दिवसांपूर्वी मुलगी माधुरी (12) हिच्यासह झारवड येथे माहेरी निघून आली होती. पतीच्या व्यसनामुळे ती सासरी जाण्यास टाळाटाळ करीत होती. त्या दोघींना घरी नेण्यासाठी किसन झारवडला आला होता. तो रविवारी सकाळी 9.30 वाजता पत्नी इंदुबाई यांना सासरी चलण्याचा आग्रह करू लागला. तेव्हा इंदुबाई स्वयंपाक करीत होत्या. त्या दरम्यान पती-पत्नीचे कडाक्याचे भांडण झाले. किसन इंदुबाईला विळ्याने मारहाण करू लागला. या दोघांचे भांडण सोडविण्यासाठी किसनच्या सासू कमळाबाई सोमा भुतांबरे (55) व मुलगी माधुरी या दोघी मध्ये पडल्या. मात्र, रागाच्या भरात किसनने कमळाबाई यांच्या पोटात व पाठीवर कात्रीने भोसकले, तर मुलीलाही जखमी केले. या हल्ल्यात कमळाबाई यांचा जागीच मृत्यू झाला, तर इंदुबाई व माधुरी जखमी झाल्या.
आरडाओरड ऐकून परिसरातील नागरिकांनी धाव घेऊन संशयित किसन पारधी याला जागीच पकडून ठेवले व या घटनेबाबत घोटी पोलिसांना माहिती दिली. जखमी इंदुबाई व माधुरी यांना उपचारार्थ जिल्हा रुग्णालयात रवाना करण्यात आले. घटनेची माहिती मिळताच अपर पोलिस अधीक्षक माधुरी कांगणे, उपविभागीय पोलिस अधिकारी कविता फडतरे, घोटीचे सहायक पोलिस निरीक्षक दिलीप खेडकर यांनी घटनास्थळी धाव घेतली व तपासाबाबत सूचना दिल्या. घोटी पोलिसांनी बाळा निवृत्ती भुतांबरे (27) याच्या फिर्यादीवरून संशयित किसन महादू पारधी याच्याविरुद्ध खून, जिवे मारण्याचा प्रयत्न आदी कलमांखाली गुन्हा दाखल केला असून, त्याला अटक केली आहे. पुढील तपास सहायक निरीक्षक श्रद्धा गंधास यांच्यासह हवालदार कोरडे, शीतल गायकवाड, रवी जगताप आदी करीत आहेत. या घटनेने इगतपुरी व त्र्यंबकेश्वर तालुक्यात खळबळ उडाली आहे.
