Sanjay Raut on Pradeep Purnekar Murder : शिवसेनेचे ठाण्यातील विभागप्रमुख प्रदीप पूर्णेकर यांची हत्या राजकीय वैमनस्यातूनच झाली आहे. हल्लेखोरांना मीनाक्षी शिंदे यांच्या घरी जाताना पाहिले आहे, हा आरोप आमचा नाही; त्यांची हत्या झाल्याचा आरोप त्यांच्या मुलाने केला आहे. त्यांनी मीनाक्षी शिंदे यांच्याविरुद्ध निवडणूक लढवली होती. आता या प्रकरणी नव्याने जबाब नोंदवावेत, असे आवाहन शिवसेना (ठाकरे गट) खासदार संजय राऊत यांनी केले.
माध्यमांशी बोलताना संजय राऊत म्हणाले की, "प्रदीप पूर्णेकरांची हत्या हे एक राजकीय षड्यंत्र आहे. त्यांनी महानगरपालिकेची निवडणूक मीनाक्षी शिंदे यांच्याविरोधात लढवली होती. ठाण्याची अवस्था बीडपेक्षा भयंकर आहे. देवेंद्र फडणवीस यांना माहिती नसेल तर ते अपयशी गृहमंत्री आहेत."
दादागिरीचा अंत होतो, फार काळ चालत नाही. हत्या प्रकरणी आम्ही आयुक्तांसह उपमहापौरांना पत्र लिहिले आहे. खुनाची चौकशी करावी, अशी मागणी केली आहे. हे प्रकरण न्यायालयात टिकेल, असा विश्वासही संजय राऊत यांनी व्यक्त केला.
मुख्य निवडणूक आयुक्तांविरोधात मुंबईत ४ ऑक्टोबर रोजी मोर्चाचे आयोजन करण्यात आले आहे. तो एक गर्जना मोर्चा आहे. यामध्ये काँग्रेस, राष्ट्रवादी आणि डावे पक्ष सहभागी होतील. काँग्रेसचे नेते बोलतील, उद्धव ठाकरे बोलतील, असेही राऊत यांनी सांगितले.
काँग्रेस पक्ष हा या देशातील एक राष्ट्रीय पक्ष आहे. त्यानुसार ते धोरण ठरवतील आणि मुख्य निवडणूक आयुक्तांना हटवण्याच्या मागणीसाठी महाराष्ट्रभर आंदोलन करतील. कॉकरोच जनता पार्टीचे आंदोलन हे शिवाजी पार्कवर आहे. १९९७ नंतर जन्मलेले 'जेन झी' (Gen Z) आहेत. २०१० नंतर जन्मलेले 'अल्फा' (Alpha) आहेत. त्यामुळे आंदोलनात आदित्य ठाकरे सहभागी होणार आहेत, अशीही माहिती त्यांनी दिली.
राष्ट्रवादी काँग्रेसचे नेते रोहित पवार हे संशोधन करूनच बोलतात. अजित पवारांच्या विमान अपघाताबाबत त्यांच्याकडे काही माहिती आली असेल, तर त्यांनी ती देशासमोर आणावी. अजित पवारांच्या विमान अपघाताबाबत रोहित पवार जेवढी माहिती घ्यायचे काम करतात, तेवढे पोलीस आणि इतर विभाग करत नाहीत, असा टोलाही त्यांनी लगावला.
