मुंबई : घाटकोपर येथील राजावाडी रुग्णालयाची मुंबईच्या महापौर रितू तावडे यांनी शनिवारी अचानक भेट रुग्णसेवा व स्वच्छतेचा आढावा घेतला. रुग्णांशी संवाद साधून त्यांच्या तक्रारी जाणून घेतल्या.
औषध पुरवठा व वितरण, लसीकरणाचा पुरवठा व वितरण याची नोंदवही तपासून दैनंदिन व नियमितपणे लसीकरण होण्यासाठी संबंधितांना योग्य ती नोंद घेण्याचे निर्देश दिले. दूर्धर आजारामध्ये इंजेक्शनचा पुरवठा का होत नाही? याची माहिती महापौरांनी घेतली. तसेच संबंधित अधिकाऱ्यांची तातडीने बैठक लावण्याचे निर्देशही अधिष्ठातांना यावेळी दिले.
राजावाडी रुग्णालयाचे पुनर्विकासाचे काम सुरू असून पहिल्या टप्प्यातील काम हे अतिशय संथ गतीने सुरू असल्याचे नागरिकांनी निदर्शनास आणून दिले असता, संबंधित अधिकाऱ्यांना महापौरांनी विचारणा केली.
रुग्णांच्या आरोग्याच्या दृष्टिकोनातून बांधकामाचा संपूर्ण परिसर आच्छादित करण्याचे निर्देशही महापौरांनी यावेळी दिले. अन्नपुरवठ्यामध्ये थाळीचा दर्जा चांगला ठेवा, जुनी वायरिंग काढून नवीन टाका, रंगरंगोटी करा अशा काही महत्त्वपूर्ण सूचनाही यावेळी केल्या.
यावेळी स्थानिक नगरसेवक धर्मेश गिरी,प्रमुख वैद्यकीय अधीक्षक (माध्यमिक आरोग्य सेवा ) डॉ.पवार, वैद्यकीय अधीक्षका डॉ. भारती राजूलवाला उपस्थित होत्या.
