मुंबई : मुंबईच्या वाहतूक व्यवस्थेत बदल घडवण्याच्या उद्देशाने मुंबई ट्रान्सपोर्ट स्टॅक कार्यान्वित करण्यात आला आहे. या माध्यमातून ओपन डेटा एक्सचेंज प्लॅटफॉर्म उपलब्ध होणार असून मुंबईचे संपूर्ण वाहतूक जाळे एका सूत्रात बांधले जाणार आहे.
एमएमआरडीएने या पथदर्शी डिजिटल प्लॅटफॉर्मच्या निर्मितीसाठी जपान इंटरनॅशनल को-ऑपरेशन एजन्सीसोबत (जायका) भागीदारी केली आहे. जगभरातील शहरांना डेटा-आधारित वाहतूक व्यवस्था उभारण्यात मदत करणाऱ्या जायका डीएक्स लॅबचे या प्रकल्पाला सहकार्य लाभणार आहे.
बुधवारी एमएमआरडीएचे महानगर आयुक्त डॉ. संजय मुखर्जी यांच्या नेतृत्वाखाली महा मुंबई मेट्रोच्या व्यवस्थापकीय संचालक रुबल अग्रवाल, महा मुंबई मेट्रो आणि एमएमआरडीएचे उप महानगर आयुक्त अजिंक्य पडवळ यांनी जायकाच्या विज्ञान, तंत्रज्ञान माहिती आणि डिजिटल परिवर्तन कार्यालयाचे वरिष्ठ संचालक यामाडा टोमोयुकी आणि उपसंचालिका नायमुरा मालिको यांच्याशी सविस्तर चर्चा करून मुंबई ट्रान्सपोर्ट स्टॅक हा उपक्रम सुरू केला.
मुंबई ट्रान्सपोर्ट स्टॅक ही एक डिजिटल सार्वजनिक पायाभूत सुविधा आहे. याद्वारे सुरक्षित डेटा हायवेद्वारे जोडलेली एकात्मिक वाहतूक व्यवस्था निर्माण होईल. सामान्य प्रवाशांना एकाच ठिकाणाहून प्रवासाच्या सुरुवातीपासून शेवटपर्यंतचे तिकीट बुक करता येईल. ट्रेन, बस आणि मेट्रोचे नेमके ठिकाण मोबाईलवर पाहता येईल. एका ठिकाणाहून दुसऱ्या ठिकाणी जाण्यासाठी विविध वाहतूक साधनांचा वापर करून प्रवासाचे नियोजन सोपे होईल. पार्किंग उपलब्धतेची रिअल-टाईम माहिती मिळेल.
