मुंबई : मुंढवा जमीन विक्री प्रकरणात कागदपत्रांची कोणतीही तपासणी न करता दस्ताची नोंदणी केल्याप्रकरणी निलंबित झालेले पुणे येथील दुय्यम निबंधक राजेंद्र तारू व तहसीलदार सूर्यकांत येवले यांना आता सेवेतून बडतर्फ केले जाणार असून, दोघांनाही तशा नोटिसा पाठविण्यात आल्या आहेत.
दिवंगत उपमुख्यमंत्री अजित पवार यांचा मुलगा पार्थ पवार यांच्या अमेडिया कंपनीने मुळशी तालुक्यातील मौजे मुंढवा येथे आयटी पार्क व डाटा सेंटर उभारण्यासाठी बोटॅनिकल सर्व्हे ऑफ इंडियाच्या ताब्यात असलेली 40 एकर सरकारी जमीन खरेदी केली. महार वतनाची जमीन असलेला हा 1800 कोटी रुपये किमतीचा भूखंड केवळ 300 कोटी रुपयांना त्यांनी खरेदी केला. हे प्रकरण उघडकीस येताच तारू आणि येवले यांना निलंबित करण्यात आले.
आता त्यांच्यावर बडतर्फीची कारवाई करण्यापूर्वी पोलिस प्रशासन आणि विधी व न्याय विभागाकडून अभिप्राय मागवण्यात आला आहे. पोलिस प्रशासनातील भ्रष्ट अधिकारी-कर्मचाऱ्यांच्या विरोधात ही कारवाई करताना कलम 311 चा वापर केला जातो. अशा कारवाईला कोणी आव्हान दिले असल्यास न्यायालयात काय उत्तर दिले, प्रशासनाने कोणती पावले उचलली आदी माहिती घेऊनच राज्य सरकार पुढील पाऊल टाकणार असल्याची माहिती मंत्रालयातील वरिष्ठ अधिकाऱ्याने दिली.
