मुंबई : वर्सोवा-भाईंदर सागरी किनारा मार्गासाठी कांदिवली चारकोप सेक्टर 8 परिसरामध्ये माती परीक्षण आणि पायलिंगचे काम सुरू असताना इमारतींना हादरे बसले. या इमारतींची शनिवारी व्हीजेटीआय पथकाकडून पाहणी करण्यात आली.
या प्रकारामुळे चारकोप श्री गजानन को-ऑप हाऊसिंग सोसायटीमधील रहिवाशांमध्ये भीतीचे वातावरण पसरले आहे. या इमारतीला हादरे बसल्याने घरातील खिडक्यांची तावदाने वाजली, वस्तू हलल्याचे नागरिकांना जाणवले.
या संपूर्ण घटनेची माहिती घेण्यासाठी व्हीजेटीआयचे डीन अभय भांबोले यांनी चारकोप येथील काम सुरु असलेल्या साइटला भेट दिली. यावेळी त्यांनी कामामुळे होणाऱ्या कंपनांच्या आवाजाची मोजणी केली असून काम करताना योग्य ती खबरदारी घ्यावी, असे निर्देश दिले. तसेच नागरिकांच्या मनातील शंका व भीती दूर करण्यासाठी लवकरच अधिकाऱ्यांची बैठक घेण्यात येणार असल्याचेही त्यांनी सांगितले.
